Shtatë cisterna nafte, që mbajnë rreth 288,000 tonë naftë ruse (dizel), po lundrojnë aktualisht drejt Shteteve të Bashkuara.
Megjithatë, mbetet e paqartë nëse anijet do të mund ta shkarkojnë ngarkesën, duke pasur parasysh debatin politik mbi ligjshmërinë e këtyre dërgesave, shkruan The Guardian, përcjell Telegrafi.
Ky transport, i gjurmuar nga grupi aktivist “Greenpeace”, përbën fazën e parë të një marrëveshjeje të diskutueshme furnizimi, të negociuar mes presidentëve Donald Trump dhe Vladimir Putin në fillim të këtij muaji – një lëvizje që zhbën sanksionet shumëvjeçare ndaj naftës ruse.
Raportet e mëparshme flisnin për tre cisterna që ishin nisur nga terminalet ruse të naftës në Detin Baltik; por, duke shfrytëzuar burime të ndryshme – përfshirë faqet e internetit që gjurmojnë lëvizjet e anijeve – “Greenpeace” vlerëson se monitorimi i tyre është më i ploti i kryer deri më tani.
Shaun Burnie, një specialist i energjisë pranë “Greenpeace” në Ukrainë, theksoi se tani që vendndodhja e cisternave mund të përcaktohet në hartë, dërgesat duhet të ndalohen nga Kongresi ose autoritetet vendore në SHBA.
“Në vend që të shpërblehet Rusia për luftën e saj të tmerrshme kundër Ukrainës, duhet të ketë sanksione edhe më të ashpra ndaj saj”, tha ai. “Këto dërgesa mund të ndalohen”.
Rusia është përballur me valë sanksionesh ekonomike nga SHBA-ja, BE-ja, Mbretëria e Bashkuar dhe ekonomitë e tjera kryesore perëndimore, që kur Putini nisi pushtimin në shkallë të gjerë të Ukrainës në shkurt të vitit 2022.
Megjithatë, këtë vjeshtë, Trump ka ndryshuar qasje dhe është përpjekur të bashkëpunojë më ngushtë me Putinin, edhe pse Rusia nuk ka ndaluar sulmet ndaj fqinjit të saj.
Në fillim të kësaj jave, një grup ligjvënësish amerikanë, të udhëhequr nga disa senatorë demokratë, paralajmëruan bankat dhe autoritetet portuale se mund të përballen me hetime nga Kongresi dhe masa të tjera ligjore, nëse trajtojnë naftën ruse (dizelin). /Telegrafi/