Shkupi ka nisur përgatitjet për ardhjen e 100 autobusëve të rinj elektrikë, ndërsa paralelisht po punohet për itineraret, instalimin e karikuesve dhe sigurimin e kapacitetit më të madh elektrik në bazën e autobusëve në Autokomandë.
Kryetari i Qytetit të Shkupit, Orce Gjorgjievski, tha se përgatitjet po zhvillohen në përputhje me afatet e prodhimit dhe dorëzimit, në mënyrë që autobusët të mund të hyjnë në qarkullim menjëherë pas mbërritjes.
Një nga ndërhyrjet kryesore është në Autokomandë, ku duhet të sigurohet furnizim më i fuqishëm me energji dhe kapacitet më i madh për karikimin e autobusëve.
Gjorgjievski hodhi poshtë pretendimet se autobusët tashmë janë prodhuar dhe se Shkupi ka mbetur prapa me përgatitjet infrastrukturore.
“Ekziston një afat për dorëzim. Autobusët nuk mund të jenë gati menjëherë pasi të përfundojë prokurimi publik”, deklaroi ai, duke theksuar se infrastruktura duhet të përgatitet paralelisht me prodhimin.
Prokurimi i Ministrisë së Transportit parashikon 150 autobusë elektrikë dhe 75 stacione karikimi. Prej tyre, 100 autobusë janë të destinuar për Shkupin, ndërsa 50 për komuna të tjera.
Pas anulimit të tenderit të parë në maj, procedura u përsërit. Në tenderin e ri, oferta më e ulët, me vlerë rreth 3,12 miliardë denarë pa TVSH, u dorëzua në korrik nga kompania hungareze “IKARUS Electric” dhe EVN. Në garë kishte katër ofertues, ndërsa dy oferta plotësuan kushtet për ankandin elektronik.
Autobusët do të dorëzohen në tri faza: 30 brenda gjashtë muajve, 60 brenda 12 muajve dhe 60 të tjerë brenda 18 muajve.
Për Shkupin, shpërndarja e saktë e autobusëve sipas fazave ende nuk është bërë publike. Flota e re është pjesë e planit për modernizimin e transportit publik, krahas projekteve për BRT dhe trenin e qytetit.
Gjorgjievski ka njoftuar më herët se aktivitetet në terren për BRT pritet të nisin në vitin 2027.
Tashmë sfida kryesore është që karikuesit, furnizimi me energji dhe depot të jenë gati përpara mbërritjes së autobusëve të parë, në mënyrë që ata të mund të futen menjëherë në qarkullim.