Gjethet me nuanca të gjelbra, argjendta, vjollcë dhe rozë e bëjnë veçanërisht tërheqëse, ndërsa një gabim i zakonshëm gjatë ujitjes mund ta dëmtojë rëndë
Tradeskancia (Tradescantia) është një nga bimët dekorative të shtëpisë që rritet shpejt, shumohet lehtë dhe tërheq vëmendjen me gjethet e saj shumëngjyrëshe. E gjelbra, argjendta, vjollca dhe roza ndërthuren në modele të veçanta, duke e bërë këtë bimë një zbukurim të bukur për çdo ambient.
Megjithëse nuk kërkon shumë përkujdesje, një gabim i zakonshëm mund ta dëmtojë seriozisht: ujitja e tepërt.
Duket veçanërisht bukur në vazo të varura ose në rafte të larta, prej nga kërcellet e saj mund të bien lirshëm, duke krijuar një perde natyrale me gjethe shumëngjyrëshe.
Ekzistojnë shumë lloje dhe varietete të saj, nga Tradescantia zebrina, me vijat karakteristike të argjendta dhe të gjelbra, deri te varieteti Nanouk, i dallueshëm për gjethet në nuanca rozë, të bardha dhe të gjelbra.
Ku duhet ta vendosni që të rritet sa më bukur?
Tradeskancia ka nevojë për shumë dritë, por preferon që ajo të jetë kryesisht e tërthortë. Vendi më i përshtatshëm është pranë një dritareje, ku merr ndriçim të bollshëm pa u ekspozuar ndaj diellit të fortë të mesditës.
Nëse nuk ka dritë të mjaftueshme, kërcellet zgjaten dhe hollohen, largësia ndërmjet gjetheve rritet, ndërsa ngjyrat karakteristike fillojnë të zbehen.
Gjatë verës mund të qëndrojë edhe në ballkon, por duhet të mësohet gradualisht me kushtet e jashtme dhe të futet brenda përpara se temperaturat të ulen ndjeshëm.
Gabimi më i zakonshëm: Ujitja e tepërt
Ujitja është pjesa më e rëndësishme e përkujdesjes për këtë bimë.
Tradeskancia duhet të ujitet vetëm pasi disa centimetra të shtresës së sipërme të dheut të jenë tharë. Uji i tepërt duhet të kullojë lirshëm përmes vrimave në fund të vazos.
Nëse dheu qëndron vazhdimisht i lagësht, rrënjët mund të kalben, gjethet të zverdhen dhe kërcejtë të zbuten.
Gjatë dimrit, ujitja duhet të rrallohet, sepse bima rritet më ngadalë dhe shpenzon më pak ujë.
Për rritje të shëndetshme rekomandohet dhe i shkrifët, me kullim të mirë. Mund t’i shtohet edhe pak perlit, ndërsa plehërimi një herë në muaj gjatë pranverës dhe verës zakonisht është i mjaftueshëm.
Si ta mbani të dendur dhe plot gjethe?
Kur kërcejtë bëhen shumë të gjata dhe fillojnë të humbasin gjethet, shkurtojini pak mbi vendin nga ku dalin gjethet.
Krasitja nxit degëzimin dhe ndihmon që bima të ruajë një pamje më të dendur.
Degët e shëndetshme që keni prerë nuk keni nevojë t’i hidhni. Vendosini në një gotë me ujë, në mënyrë që të paktën një nyjë e kërcellit të jetë e zhytur.
Pasi të shfaqen rrënjët, mund t’i mbillni në një vazo tjetër ose t’i ktheni në vazon ekzistuese, për ta bërë bimën edhe më të harlisur.
Foto: Dimaberlin
Kujdes nëse keni fëmijë të vegjël ose kafshë shtëpiake
Lëngu i tradeskancias mund të shkaktojë acarim të lëkurës te personat e ndjeshëm. Disa lloje mund të shkaktojnë edhe probleme te kafshët shtëpiake, veçanërisht acarim të lëkurës.
Prandaj, është mirë të vendoset larg fëmijëve të vegjël dhe kafshëve shtëpiake, ndërsa duart të lahen pas krasitjes.
Me dritë të mjaftueshme, ujitje të kontrolluar dhe krasitje të herëpashershme, tradeskancia mund të bëhet një nga bimët më tërheqëse të shtëpisë, duke sjellë ngjyra dhe gjallëri gjatë gjithë vitit. /Telegrafi/