Drejtoria e Shërbimeve Publike dhe Infrastrukturës në Mitrovicë ka realizuar ndërhyrje në hapësirat e Spitalit të Përgjithshëm, duke rikthyer ndriçimin publik pas një periudhe të gjatë të mungesës së tij.
Këtë e ka bërë të ditur drejtori i kësaj drejtorie, Naser Muja, i cili ka njoftuar se përveç rikthimit të ndriçimit, është realizuar edhe pastrimi i sipërfaqeve nga mbeturinat dhe vendosja e antiparkuesve.
Sipas Mujës, këto ndërhyrje synojnë rritjen e sigurisë dhe përmirësimin e kushteve për pacientët, stafin shëndetësor dhe qytetarët që frekuentojnë këtë hapësirë.
Ai u ka bërë thirrje qytetarëve që të kujdesen për pastërtinë, të ruajnë hapësirat publike dhe të respektojnë rregullat e parkimit, në mënyrë që ato të mbeten të sigurta, të pastra dhe funksionale për të gjithë.
Muja ka theksuar se angazhimet për mirëmbajtjen dhe rregullimin e hapësirave publike do të vazhdojnë në shërbim të qytetarëve. /Telegrafi/