Një udhëtim që duhej të ishte rutinë u shndërrua në makth për Denver Nuggets.
Skuadra mbeti e bllokuar në Mexico City për më shumë se 24 orë, për shkak të problemeve teknike me aeroplanin që duhej ta kthente në SHBA.
Gjithçka nisi pas fitores 114:102 ndaj Indiana Pacers. Kur ekipi ishte gati të largohej, u konstatua një defekt që kërkonte zëvendësimin e një pjese të aeroplanit.
Edhe pse riparimi përfundoi, ekuipazhi zbuloi se dera nuk mbyllej, duke bërë që i gjithë delegacioni të kthehej në hotel gjatë orëve të para të mëngjesit.
Vetëm të dielën pasdite Nuggets arritën të fluturonin drejt Houstonit, ku mbërritën në orën 18:30.
Gazetarja Katy Winge e përshkroi këtë përvojë si një nga netët më të këqija të udhëtimit që mban mend me skuadrën.
Problemet mund të kenë pasoja edhe në parket. Para përballjes me Houston Rockets, të pesë titullarët e Denverit u paraqitën në raportin e lëndimeve me status të pasigurt, përfshirë yjet Nikola Jokic dhe Jamal Murray. /Zëri