NPL “Kastrioti” ka njoftuar qytetarët e Obiliqit se nga 1 qershori i vitit 2026 përgjegjësinë për menaxhimin, grumbullimin dhe faturimin e mbeturinave në këtë komunë e ka marrë kjo ndërmarrje.
Në një njoftim të kryeshefit ekzekutiv, Flakron Mjekiqi, thuhet se për periudhën nga qershori 2026 e tutje, KRM “Pastrimi” nuk është ndërmarrja përgjegjëse për ofrimin e këtyre shërbimeve në territorin e Obiliqit.
NPL “Kastrioti” ka bërë të ditur se, në rast se KRM “Pastrimi” nis procedura përmbarimore për faturat e kësaj periudhe, do t’i mbështesë qytetarët në kundërshtimin e kërkesave të tilla, në përputhje me procedurat ligjore.
Sipas njoftimit, qëllimi është mbrojtja e interesit të qytetarëve dhe garantimi i sigurisë juridike, në mënyrë që ata të mos ngarkohen me detyrime për shërbime, përgjegjësia për ofrimin e të cilave duhet të verifikohet.
Megjithatë, njoftimi i NPL “Kastrioti” paraqet qëndrimin e kësaj ndërmarrjeje dhe nuk nënkupton vetvetiu se faturat e lëshuara nga KRM “Pastrimi” janë të pavlefshme ose se procedurat përmbarimore do të anulohen. Kjo çështje varet nga baza ligjore dhe rrethanat konkrete të secilit rast. /Telegrafi/