Përmes platformës e-Kosova, qytetaret tash e një kohe mund t’i shohin gjobat dhe masat mbrojtëse të regjistruara në sistem.
Ndërkaq qe nga 19 tetori me shërbimin e ri, do të njoftohen edhe përmes SMS-ve, sapo të regjistrohet gjoba.
Kështu ka bërë të ditur Policia e Kosovës përmes një njoftimi.
“Përmes këtij shërbimi të ri qytetarët mund të përfitojnë nga dy funksione kryesore:
Qytetarët njoftohen përmes platformës e-Kosova dhe mesazhit elektronik (SMS-ve), sapo të regjistrohet gjoba në sistem. Përmes platformës e-Kosova, qytetarët njoftohen për gjoba dhe masat mbrojtëse ndërsa pronarët e bizneseve mund të shohin raportin përkatës të gjendjes së tyre rreth gjobave, i cili paraqitet drejtpërdrejt në e-Kosova”, thuhet nga Policia.
E disa nga qytetaret e kanë mirëpritur këtë vendim.
Njeri nga ta veç se ka qenë viktimë e mos njoftimit me kohë.
“Kam shkuar me regjistru në Qendrën e Regjistrimit të Veturave edhe më ka dalë një dënim 300 euro. Edhe, siç duket, është dënim që ka ndodhur përmes veturave inteligjente, se di, se qysh. Kam kërkuar, nga ka ardhur ky dënim, edhe, s’më kanë dhënë kurrfarë përgjigje. Më është dashur me pagu 300 euro dënim”, thotë Nazmi Sahiti -qytetar
Ndërsa njoftimin përmes SMS-it e sheh si zgjidhje të dobishme.
“Në qoftë se lidhet me mesazh, me pas njerëzit e update me numra të telefonit, besoj se është zgjidhja më e mirë. Vjen mesazh, ta kujton se e keni dënim, a prej inteligjencës, a prej semaforëve inteligjenta, qysh e tek. Mirëpo, me të ardhur mesazh, unë mendoj që është zgjidhje e mirë”, shprehet ai.
E edhe dikush tjetër thotë se i duhej te kontrollonte herë pas here platformën e-Kosova për t’u siguruar nëse ka gjobë.
“Nëse vjen mesazh në telefon është mirë, se unë e dëgjova një herë që veç vjen në Kosova, edhe dy-tri herë e kam këqyrë faqen për me u siguruar që s’kam dënim. E nëse bëjnë edhe me ardh mesazh, më duket mirë”, thotë Arban Hoxha –qytetar.
Ndërsa sipas ekspertit të komunikacionit, Lavdim Hamiti, e rëndësishme është që shoferët të njoftohen me kohë për dënimet.
“Ky është dashur të jetë, do të thotë, me momentin që është, është sistemuar, do të thotë pjesa e e-Kosovës, bashkërisht është dashur të jetë edhe njoftimi përmes SMS-it. Sepse ka pasur shumë probleme, për shembull që ka pas, gjobën në e-Kosova dhe nuk e ka dit se ku ka ardh ajo gjobë, mund të jetë ndonjë vend parkim, mund t’i hapet diku ndonjë veturë dhe është sistemuar, do të thotë pjesa e gjobës, do të thotë SMS-ja nuk i ka shku pronarit. Pronari shpeshherë nuk e ka dit se ku është gjobitur. Kështu që kjo është e mira, sepse përmes SMS-it do të njoftohet, unë mendoj që do të njoftohet brenda 24 orë apo 48 orëve, mos të jetë edhe më larg, edhe përmes asaj pjese për 24 orë apo 48 orë, normal se e di secili shofer se ku është gjobitur për shkak, vendparkingut, po marr si shembull, apo edhe tejkalimi në shpejtësi, apo edhe përdorimi i telefonit, apo ku ta di të tjerat”, thotë ai.
Policia e Kosovës vlerëson se ky zhvillim kontribuon në përmirësimin e qasjes së qytetarëve në informata, rritjen e transparencës dhe lehtësimin e komunikimit ndërmjet institucioneve dhe publikut./teve1