Ceremonia e Topit të Artë, e mbajtur të hënën në Londër, mblodhi yjet më të mëdhenj të futbollit botëror.
Përveç garës për çmimet individuale, vëmendja u përqendrua edhe te stili dhe aksesorët luksozë të të pranishmëve.
Sipas një raportimi të mediumit “Goal”, i cili iu referua një faqeje të specializuar në orët luksoze, disa nga futbollistët dhe të ftuarit e njohur u paraqitën me modele ekskluzive nga markat më prestigjioze të industrisë.
Harry Kane, fituesi i Topit të Artë 2026, mbante një Rolex Cosmograph Daytona prej ari të bardhë, me fushë ore prej obsidiani dhe safirë blu, me numër reference 126599TSA.
Ousmane Dembélé zgjodhi një Richard Mille RM 55-01, ndërsa Lamine Yamal u paraqit me modelin Richard Mille RM 67-01 prej ari rozë, me mekanizëm automatik ultra të hollë.
Kylian Mbappe, i cili përfundoi në vendin e dytë në garën për Topin e Artë, mbante një Hublot Classic Fusion Tributo Yellow Gold, ndërsa legjenda franceze Thierry Henry u shfaq me një Patek Philippe Nautilus, të modifikuar me karbon nga kompania DiW.
Edhe Figo, Rodri dhe Ronaldo Nazário me modele ekskluzive
Lista e orëve luksoze nuk përfundonte me tre pretendentët kryesorë për çmimin më të madh individual.
Ish-futbollisti portugez Luís Figo mbante një Hublot Classic Fusion Chronograph King Gold, ndërsa Rodri u paraqit me një IWC Portugieser Perpetual Calendar 44, të njohur si “Silver Moon”.
Ndërkohë, legjenda braziliane Ronaldo Nazário kishte zgjedhur një model të veçantë nga H. Moser & Cie., Endeavour Tourbillon Concept Vantablack.
Edhe këngëtari Burna Boy ishte pjesë e kësaj parade luksi, me një Patek Philippe Nautilus Chronograph prej ari rozë.
Kështu, përveç trofeve, emocioneve dhe momenteve sportive, ceremonia e Topit të Artë u shndërrua edhe në një vitrinë të orëve ekskluzive, ku secili prej të pranishmëve prezantoi stilin e tij përmes markave më të njohura të orëndreqjes luksoze. /Zëri