Ministria e Infrastrukturës dhe Transportit po vazhdon punimet për rehabilitimin dhe sanimin e skarpateve përgjatë autostradës “Ibrahim Rugova”, me qëllim rritjen e sigurisë rrugore dhe parandalimin e rrëshqitjeve të dheut.
Sipas njoftimit të ministrisë, në disa segmente të autostradës tashmë janë duke u zhvilluar punimet rehabilituese, ndërsa për segmentet e tjera është duke u realizuar riprojektimi. Pas përfundimit të këtij procesi, pritet të vazhdojnë procedurat për kontraktimin e punimeve të sanimit.
Paralelisht, po kryhen analiza dhe vlerësime teknike për identifikimin e zonave që kanë nevojë për ndërhyrje shtesë.
Ministria e Infrastrukturës dhe Transportit ka bërë të ditur se siguria e qytetarëve mbetet prioritet, duke theksuar se përmes ndërhyrjeve konkrete dhe zgjidhjeve afatgjata synohet të sigurohet stabiliteti i skarpateve dhe qarkullim më i sigurt për të gjithë shfrytëzuesit e autostradës. /Lajmi.net/
Postimi i plotë:
Burimi: lajmi.net ↗