Një shumicë e mundshme demokrate në Kongresin amerikan mund të sjellë mbështetje më të fuqishme për vendet e Ballkanit Perëndimor në rrugën e tyre drejt Bashkimit Evropian, ka vlerësuar Matthew Palmer, duke folur për ndikimin e mundshëm të ndryshimeve politike në Washington.
Gjatë bisedës në televizionin N1, është diskutuar edhe për të ardhmen e politikës amerikane ndaj Ballkanit Perëndimor, veçanërisht pas zvogëlimit të pranisë amerikane në rajon dhe shfuqizimit të Agjencisë Amerikane për Zhvillim Ndërkombëtar (USAID).
Palmeri ka thënë se një shumicë demokrate në Kongres mund të kontribuojë në rritjen e mbështetjes për integrimin evropian të vendeve të rajonit. Ai ka theksuar në veçanti rëndësinë e normalizimit të marrëdhënieve ndërmjet Kosovës dhe Serbisë, si dhe të integrimit evropian të Kosovës dhe Maqedonisë së Veriut.
Ndër politikanët amerikanë që kanë mbështetur vazhdimisht Ballkanin Perëndimor, Palmer ka veçuar Gregory Meeks dhe Chris Coons, për të cilët ka thënë se janë mbështetës të fuqishëm të rajonit.
Ai ka shprehur pritjen që mbështetja amerikane për integrimin evropian të vendeve të Ballkanit Perëndimor të vazhdojë.