Jugosllav Gashiq, kandidat i Listës Studentore në Serbi, thotë se lista e tij s’do të bashkëpunojë me Listën Serbe, të cilën e cilëson si zgjatim të partisë së Aleksandar Vuçiqit.
Por për statusin e Kosovës, ai thotë se Lista Studentore do t’i përmbahet programit të saj, i cili mbështetet në Kushtetutën e Serbisë.
Pas fitores së Listës Studentore në zgjedhjet parlamentare të 25 tetorit në Serbi, një delegacion i saj vizitoi Graçanicën dhe Deçanin. Jugosllav Gashiq, kandidat i kësaj liste dhe pjesëtar i delegacionit, tha në emisionin “Pravi ugao” të Radio Televizionit të Vojvodinës se vizita kishte për qëllim të tregonte se lista do t’u qëndronte zotimeve të fushatës për Kosovën.
“Ne nuk do të heqim dorë nga ajo që kemi përfshirë në program”, tha Gashiq. Duke folur për Kosovën, ai iu referua asaj si “provinca jonë jugore”.
Në intervistën e 11 nëntorit, Gashiq kritikoi politikën që Beogradi ka ndjekur gjatë 14 vjetëve të fundit, duke e akuzuar pushtetin e deritashëm se e ka dobësuar praninë e Serbisë në Kosovë. Megjithatë, kur u pyet për deklaratën e kryeministrit Albin Kurti se pavarësia e Kosovës është realitet me të cilin duhet të përballet qeveria e re në Beograd, Gashiq u kthye te Kushtetuta e Serbisë.
“Kushtetuta e Serbisë është gjithashtu një realitet. Vetëm se ne do ta zhvendosim atë fokus te Kushtetuta e Serbisë”, tha ai.
Kjo është pika ku qëndrimi i shprehur nga Gashiq përputhet me vijën e ndjekur nga Vuçiqi. Lista Studentore premton ndryshim në mënyrën se si Beogradi vepron në Kosovë, ndërsa për statusin e saj vazhdon t’i referohet Kushtetutës serbe, e cila e trajton Kosovën si pjesë të Serbisë.
“Lista Serbe u krijua si një eksponent i SNS-së në Kosovë”
Gashiq ishte më i prerë kur u pyet nëse Lista Studentore do të bashkëpunonte me Listën Serbe. Ai e cilësoi atë si grup klientelist dhe e akuzoi për presion, shantazh dhe kushtëzim të votuesve.
“Lista Serbe u krijua si një eksponent i SNS-së në Kosovë”, tha ai, duke iu referuar Partisë Progresive Serbe të Vuçiqit.
I pyetur nëse prania e Listës Serbe në Kuvendin e Kosovës dhe në pushtetin lokal e bën të nevojshëm komunikimin, Gashiq tha se Lista Studentore, nëse do të kishte nevojë për komunikim, do ta zhvillonte atë përmes bashkësisë ndërkombëtare. Ai la hapur mundësinë e bashkëpunimit në nivel lokal mes përfaqësuesve të Listës Serbe dhe drejtuesve të rinj të institucioneve që funksionojnë sipas sistemit të Serbisë. Sipas tij, udhëheqja e këtyre institucioneve do të ndërrohej.
Çfarë kërkon në dialogun për Kosovën
Gashiq tha se në Graçanicë delegacioni u takua me mitropolitin Teodosije, ndërsa në Manastirin e Deçanit zhvilloi një bisedë rreth tri orë me atin Sava Janjiq. Sipas tij, përfaqësuesit e Kishës Ortodokse Serbe i paraqitën delegacionit shqetësimet për funksionimin e manastirit dhe kërkuan mbështetje.
Për dialogun, Gashiq tha se Lista Studentore synon të bisedojë me bashkësinë ndërkombëtare për të ruajtur funksionimin e institucioneve arsimore dhe shëndetësore që veprojnë sipas sistemit të Serbisë, si dhe për çështjet që lidhen me Kishën Ortodokse Serbe.
Kur u pyet për kërkesën e Kurtit që Beogradi të heqë dorë nga fushata kundër njohjeve ndërkombëtare të Kosovës, Gashiq iu referua Marrëveshjes së Brukselit. Ai pretendoi se Serbia i kishte përmbushur të gjitha detyrimet nga marrëveshja e parë dhe se Prishtina kishte bërë shumë pak. Pyetja nëse Beogradi do ta ndërpresë fushatën kundër njohjeve mbeti pa përgjigje të drejtpërdrejtë./Lajmi.net/