Komiteti Ndërkombëtar i Lojërave Mesdhetare (ICMG) u ka dërguar një ultimatum krerëve të institucioneve të Kosovës lidhur me organizimin e Lojërave Mesdhetare “Prishtina 2030”, ka mësuar Paparaci nga burime të mirëinformuara.
Sipas këtyre burimeve, ICMG-ja i ka dhënë afat Komitetit Organizativ që deri më 30 nëntor të nisin punimet në Pallatin e Rinisë dhe Sporteve në Prishtinë.
Në të kundërtën, Kosovës rrezikon t’i merret e drejta për organizimin e Lojërave Mesdhetare. Afati i vendosur është dhjetë ditë nga sot.
Komiteti Organizativ udhëhiqet nga kryeministri Albin Kurti. Në përbërjen e tij janë edhe përfaqësues të Komitetit Olimpik të Kosovës, Komunës së Prishtinës dhe ministrive përkatëse. Pjesë e Bordit është edhe kryetari i Prishtinës, Përparim Rama.
Ligji për Lojërat Mesdhetare “Prishtina 2030” përcakton përgjegjësitë e institucioneve për organizimin e tyre dhe financimin e projekteve të nevojshme. Qeveria obligohet të sigurojë financimin publik prej së paku 253.4 milionë eurosh.
Pallati i Rinisë është një nga projektet prioritare infrastrukturore për Lojërat.
Organizimi i Lojërave Mesdhetare është shoqëruar me përplasje mes kryeministrit Albin Kurti dhe kryetarit të Prishtinës, Përparim Rama.
Rama e ka kritikuar Qeverinë për mungesë koordinimi dhe mosrealizim të obligimeve, ndërsa në tetor publikoi një letër të ICMG-së, në të cilën ngriheshin shqetësime për obligimet financiare dhe administrative të Kosovës.
Në atë letër, Komiteti Ndërkombëtar kishte paralajmëruar shqyrtimin e së ardhmes së organizimit të Lojërave më 19 dhjetor.
Qeveria, në anën tjetër, ka siguruar se do të jetë garantuese e organizimit të tyre.
Lojërat Mesdhetare “Prishtina 2030” pritet të mbahen nga 24 korriku deri më 4 gusht 2030.

