Një klasë e re e mësimit të gjuhës shqipe është hapur në qytetin Bulle, në kantonin e Friburgut, ku 45 fëmijë shqiptarë tashmë kanë mundësi të mësojnë gjuhën amtare.
Mësimet zhvillohen çdo të hënë dhe të mërkurë, falë bashkëpunimit të Ambasadës së Republikës së Shqipërisë në Zvicër, mësueses Xhuljeta Balla dhe prindërve shqiptarë, shkruan Telegrafi.
Ambasadori i Shqipërisë në Zvicër, Ermal Dredha, ka vizituar klasën e re, ku është takuar nga afër me nxënësit, mësuesen dhe prindërit.
Gjatë kësaj vizite, në kuadër të programit shumëvjeçar për mbështetjen e mësimit të gjuhës shqipe në diasporë, Ambasada ka shpërndarë tekste shkollore për fëmijët.
Në njoftimin e saj, Ambasada ka shprehur mirënjohje për mësuesen dhe prindërit, për përkushtimin dhe angazhimin në ruajtjen dhe përcjelljen e gjuhës shqipe te brezat e rinj.
“Çdo klasë e re shqipe është një vatër dijes dhe identitetit, duke u dhënë mundësi fëmijëve tanë të rriten e të integrohen në shoqërinë zvicerane, pa humbur lidhjen me gjuhën, kulturën dhe rrënjët e tyre”, thuhet në postimin e Ambasadës./Telegrafi/
Postimi i plotë: