U. D. Drejtori i Përgjithshëm i Policisë së Kosovës, kolonel Fehmi HOTI, me bashkëpunëtorë, ka pritur në takim Ambasadorin e Mbretërisë së Bashkuar në Kosovë, z. Jonathan Hargreaves, i shoqëruar nga përfaqësues të ambasadës.
Gjatë takimit u diskutuan çështje me interes të përbashkët, me fokus në bashkëpunimin ndërmjet Policisë së Kosovës dhe Mbretërisë së Bashkuar, si dhe në mbështetjen e vazhdueshme për avancimin e kapaciteteve institucionale dhe profesionalizimin e mëtejmë të Policisë së Kosovës.
Me këtë rast, U. D. Drejtori i Përgjithshëm kolonel Hoti vlerësoi lartë bashkëpunimin e deritanishëm ndërmjet Policisë së Kosovës dhe institucioneve të Mbretërisë së Bashkuar, si një partneritet i rëndësishëm që ka kontribuar në zhvillimin, profesionalizimin dhe forcimin e kapaciteteve policore, përmes mbështetjes, shkëmbimit të përvojave, trajnimeve dhe iniciativave të përbashkëta në fusha të ndryshme.
Të dy palët riafirmuan përkushtimin për vazhdimin dhe avancimin e bashkëpunimit në funksion të forcimit të sundimit të ligjit dhe shërbimit për qytetarët.

