Cristiano Ronaldo është dënuar me 30 ditë pezullim dhe një gjobë prej 255 eurosh nga Federata Portugeze e Futbollit (FPF), pas largimit nga grumbullimi i Përfaqësueses së Portugalisë gjatë pushimit ndërkombëtar të shtatorit.
Vendimi vjen pas procedurave disiplinore të nisura ndaj sulmuesit 41-vjeçar, i cili u largua nga grumbullimi në Danimarkë pas mosmarrëveshjeve me trajnerin Jorge Jesus.
Ronaldo kishte kërkuar falje për veprimin e tij dhe kishte shprehur gatishmërinë për t’i pranuar pasojat, duke marrë përgjegjësinë e plotë për atë që kishte ndodhur.
Incidenti nisi pas fitores 2-1 të Portugalisë ndaj Norvegjisë në Ligën e Kombeve, ndeshje në të cilën ylli portugez nuk u aktivizua fare. Ronaldo, i cili kishte pritur të luante, madje ishte ngrohur gjatë takimit, por në fund nuk mori asnjë minutë në fushë.
Situata u përshkallëzua para ndeshjes së radhës kundër Danimarkës, kur sulmuesi vendosi të largohej nga grumbullimi, pasi njoftoi federatën për vendimin e tij.
Në deklaratën e tij të faljes, kapiteni i Portugalisë pranoi se nuk duhej të vepronte në atë mënyrë, ndonëse iu referua edhe asaj që e përshkroi si shkelje të besimit nga ana e trajnerit Jorge Jesus.
“U kërkoj falje bashkëlojtarëve të mi të Përfaqësueses për largimin nga grumbullimi. Pavarësisht shkeljes së plotë të besimit në fjalën e trajnerit, siç mund ta dëshmojnë të gjithë ata që i kanë parë bisedat tona, nuk është dashur ta bëja këtë. Përgjegjësia është tërësisht e imja”, kishte deklaruar Ronaldo.
Pesë herë fituesi i Topit të Artë kishte theksuar gjithashtu se nuk duhej të përfitonte nga statusi i tij si kapiten për t’i shpëtuar një ndëshkimi më të lehtë.
“Pasojat e veprimeve të mia duhet të vlerësohen dhe të ndëshkohen nga federata. Dënimi nuk duhet të ketë asnjë rrethanë lehtësuese. Unë nuk jam thjesht një lojtar, por kapiten i Përfaqësueses, dhe kjo përbën një rrethanë rënduese”, kishte thënë ai.
Ronaldo mbetet golashënuesi më i mirë në historinë e Portugalisë, me 146 gola në 234 paraqitje.
Ai ka përfaqësuar vendin e tij për më shumë se dy dekada dhe ka bërë të ditur se dëshiron të vazhdojë të luajë për kombëtaren edhe në të ardhmen.
Portugalia do t’i zhvillojë ndeshjet e radhës në Ligën e Kombeve në muajin nëntor, ndërsa pezullimi mund të ndikojë në gatishmërinë e Ronaldos për atë periudhë. /Telegrafi/