E ardhmja e Michael Carrick në krye të Manchester United vazhdon të mbetet e paqartë, ndërsa drejtuesit e klubit anglez ende nuk kanë marrë një vendim përfundimtar lidhur me pozitën e trajnerit.
Pas humbjes së rëndë 3-0 ndaj Bournemouthit në “Old Trafford”, drejtuesit e United kanë zhvilluar diskutime të gjata për të ardhmen e trajnerit anglez, por deri më tani nuk kanë arritur një marrëveshje për hapat e ardhshëm.
Sipas gazetarit Chris Wheeler të Daily Mail, Carrick është lënë në pritje dhe ende nuk është njoftuar nëse do të shkarkohet nga detyra.
Pavarësisht pasigurisë për të ardhmen e tij, trajneri anglez kaloi rreth tri orë të hënën në qendrën stërvitore “Carrington”, ku ndoqi ndeshjen e ekipit U21 të Manchester United kundër Hull Cityt.
Skuadra e parë e United pritet t’u rikthehet stërvitjeve të martën, ndërsa nuk përjashtohet mundësia që Carrick të vazhdojë ta drejtojë ekipin, të paktën përkohësisht.
Ndërkohë, drejtuesit e klubit po shqyrtojnë alternativat e mundshme për stolin, me Eddie Howe dhe Julian Nagelsmann që përmenden si dy kandidatët kryesorë për ta zëvendësuar anglezin.
Megjithatë, hierarkia e Manchester United ende nuk ka përcaktuar kandidatin e preferuar, duke e lënë të hapur çështjen e trajnerit.
Orët dhe ditët e ardhshme pritet të jenë vendimtare për të ardhmen e Carrick, i cili vazhdon të jetë nën presion të madh pas rezultateve zhgënjyese të skuadrës. /Telegrafi/