Kryeprokurori i Prokurorisë Themelore në Prizren, Petrit Kryeziu ka bërë të ditur se gjatë ditës së sotme është zbuluar pjesa që lidhet me dhënien dhe marrjen e ryshfetit, në kuadër të një hetimi të gjerë që po zhvillohet nga organet e drejtësisë.
Gjatë një konference për media, Kryeziu theksoi se të akuzuarit në këtë rast mund të marrin edhe cilësinë e dëshmitarëve, por sipas tij, në këtë fazë nuk mund të jepen më shumë detaje, pasi hetimet janë ende në zhvillim.
“Jemi ende në fazën e hetimeve, personat po intervistohen dhe është e mundur që të dalin edhe persona të tjerë të përfshirë”, deklaroi Kryeziu.
Sipas tij, gjithsej 121 persona janë ftuar për intervistim, prej të cilëve disa nuk janë paraqitur, ndërsa një pjesë janë konstatuar si të pafajshëm.
Ai shtoi se veprimet janë ndërmarrë ndaj personave të identifikuar, ku shumica prej tyre janë komisionerë.
Kryeprokurori bëri të ditur se rreth 5 persona janë liruar, ndërsa 109 persona janë ndaluar.
Po ashtu, disa nga të dyshuarit nuk i janë përgjigjur ftesës së organeve të drejtësisë, pasi ndodhen jashtë vendit, dhe për ta është nisur kërkimi.
“Do të aplikojmë edhe masa të veçanta hetimore dhe do të ndërmarrim çdo veprim të mundshëm ligjor për trajtimin e këtij rasti”, përfundoi Kryeziu.
Ndryshe, Kryeziu ka deklaruar qe edhe kandidatët për deputet mund të ballafaqohen në gjykatë me të dyshuarit me manipulime. /Telegrafi/