Bordeauxi dëshmon se dashuria e tifozëve nuk varet nga kategoria ku luan skuadra.
Klubi francez, që pas krizës financiare u detyrua të niste garat nga kategoria e gjashtë, pritet të regjistrojë një rekord të jashtëzakonshëm të dielën, në ndeshjen kundër Stade Montois.
Rreth 10 mijë bileta ishin shitur deri të shtunën, ndërsa synimi është që numri i spektatorëve në stadiumin Stade Atlantique të arrijë në 11 mijë.
Rekordi i mëparshëm për një ndeshje të kampionatit Régional 1 ishte vetëm 3.850 tifozë.
Bordeauxi, gjashtë herë kampion i Francës, kaloi një verë dramatike dhe rrezikoi falimentimin. Në fund të shtatorit, klubi u ble për një euro simbolike nga fondi britanik Park Bench, i cili mori përsipër borxhet.
Legjenda e klubit, Alain Giresse, do ta japë goditjen simbolike të fillimit të ndeshjes.
Ndonëse ka rënë në nivelin e gjashtë të futbollit francez, Bordeauxi dëshmon se historia e madhe dhe besnikëria e tifozëve nuk zhduken lehtë. /Zëri