Katër fëmijë dhe shoferi mbetën të lënduar në një aksident trafiku mbrëmjen e sotme në rrugën kryesore Mojkovac–Kolashin në Mal të Zi, pranë Shtitariçka Rijekë; në aksident u përfshi një autobus që transportonte nxënës nga një shkollë fillore e Podgoricës, konfirmoi drejtoria e policisë.
Burime policore i thanë jozyrtarisht RTCG-së se aksidenti ndodhi rreth orës 20:35, kur pati një shembje shkëmbi; shoferi u përpoq t’u shmangej gurëve që binin dhe më pas u përplas me një shkëmb përgjatë anës së djathtë të rrugës.
Katër fëmijë dhe shoferi pësuan lëndime; sipas informacioneve në dispozicion, asnjëri prej të lënduarve nuk është në rrezik për jetën dhe lëndimet janë të lehta.
Shoferi nuk ishte nën ndikimin e alkoolit gjatë drejtimit të autobusit, transmeton Telegrafi.
Raportet jozyrtare tregojnë se fëmijët e tjerë në autobus u dërguan në Podgoricë. Prindërit erdhën për të marrë disa nga fëmijët, ndërsa të tjerët u transportuan me një autobus të organizuar nga kompania që kishte planifikuar ekskursionin.
Të lënduarit u trajtuan në Spitalin e Përgjithshëm në Bijelo Pole.
“Sipas informacioneve tona, një shembje shkëmbi goditi autobusin që transportonte nxënës në ekskursion. Një automjet i Spitalit të Bijelo Poles, i cili po kthehej nga Qendra Klinike e Malit të Zi, ndodhej rastësisht në vendngjarje dhe transportoi dy vajza 15-vjeçare dhe një mësuese 43-vjeçare, ndërsa një ambulancë solli një nxënëse tjetër 15-vjeçare dhe një të rritur tjetër”, tha për RTCG Dr. Kenan Eroviq, drejtor i Spitalit të Bijelo Poles.
Ai shtoi se aktualisht po kryhen procedurat diagnostikuese për të vlerësuar gjendjen shëndetësore të të lënduarve.
Milan Madzhgal, kreu i Qendrës së Urgjencës, deklaroi se i rrituri i lënduar mund të ketë pësuar lëndime serioze, ndërsa vajzat e shtruara nuk shfaqin simptoma të lëndimeve të rënda, megjithëse është e nevojshme të priten rezultatet e diagnostikimit.