Një person është arrestuar më 22 tetor në Prishtinë, nën dyshimin për përfshirje në veprat penale të fajdesë dhe detyrimit.
Sipas komunikatës së përbashkët të Policisë së Kosovës dhe Prokurorisë Themelore në Prishtinë, operacioni është realizuar nga zyrtarët e Drejtorisë për Hetimin e Krimit të Organizuar dhe Krimeve të Rënda, në bashkëpunim me prokurorinë.
I dyshuari, me inicialet L. K., është arrestuar në flagrancë, në momentin kur dyshohet se po pranonte para nga viktima në emër të interesit të fajdesë.
Sipas autoriteteve, i dyshuari dyshohet se në vazhdimësi kishte ushtruar presion ndaj viktimës, me qëllim të përfitimit të interesit nga veprimtaria e fajdesë.
Po ashtu, ai dyshohet se e kishte detyruar viktimën të vepronte në dëm të pasurisë së tij, duke i shkaktuar dëme të konsiderueshme materiale.
Policia dhe Prokuroria kanë bërë të ditur se, në koordinim me prokurorin e rastit, po vazhdojnë veprimet e mëtejshme procedurale dhe ligjore ndaj të dyshuarit.