Barcelona në vitet e fundit është përqendruar më shumë në ruajtjen e skuadrës sesa në blerje e shitje të shumta, por ndërsa vazhdon të përballet me kufizime të rrepta financiare dhe probleme me tavanin e pagave, klubi katalanas po tregohet gjithnjë e më i hapur ndaj ofertave.
Verën e kaluar, Fermin Lopez dhe Marc Casado u lidhën ngushtë me një largim të mundshëm, ndërsa emri i këtij të fundit pritet të rikthehet sërish në qendër të diskutimeve.
Së fundmi, është raportuar se Casado do të ishte i hapur për një transferim në Arabinë Saudite gjatë kësaj vere.
Pas përfundimit të afatit veror, ai firmosi me super-agjentin Jorge Mendes, i cili ka lidhje të forta me Lindjen e Mesme.
Një lëvizje e tillë mund të nënkuptonte një “pauzë” disa vjeçare nga futbolli evropian, me mundësinë që lojtari të rikthehej më pas në Evropë në kulmin e karrierës së tij dhe me siguri të konsiderueshme financiare.
Nga ana tjetër, është raportuar gjithashtu se Barcelona po përpiqet ta bindë Casadon të nënshkruajë një kontratë të re.
Zhvillimi më i fundit vjen nga Arabia Saudite, ku gazeta katalanase Sport raporton se përfaqësues nga Arabia Saudite do të zhvillojnë një takim me agjentët e lojtarit për të kuptuar nëse ai do të ishte i interesuar për transferimin.
Nëse ai jep dritën e gjelbër, Fondi i Investimeve Publike do të miratonte një marrëveshje që tejkalon shumën prej 40 milionë eurosh.
Duke pasur parasysh se verën e kaluar çmimi i tij u përmend rreth 30 milionë euro, si dhe faktin që këtë sezon ai ka luajtur dukshëm më pak krahasuar me vitin e kaluar kur u përfshi edhe në kombëtaren e Spanjës, duket pak e mundshme që Arabia Saudite të paguajë një shumë kaq të lartë mbi vlerën e tregut në këto rrethana./Telegrafi/