Japonia u alarmua pasi Agjencia Meteorologjike e vendit lëshoi gabimisht një paralajmërim për një tërmet me magnitudë 9.9 ballë.
Kjo shkaktoi alarme emergjence në miliona telefona celularë.
Alarmi i gabuar u tërhoq disa minuta më vonë, me autoritetet që kërkuan falje publikisht për shqetësimin dhe problemet e shkaktuara.
Incidenti ndodhi kur Agjencia Meteorologjike e Japonisë (JMA) njoftoi fillimisht se një tërmet i fuqishëm me magnitudë 9.9 ishte regjistruar pranë Ishujve Kurile.
Megjithatë, vlerësimi fillestar rezultoi i pasaktë.
Pak më vonë, agjencia bëri një korrigjim, duke sqaruar se tërmeti kishte një magnitudë prej 6.9 ballë dhe ndodhi pak pas mesditës pranë Gadishullit Kamçatka në Rusi, në një thellësi fokale prej rreth 160 kilometrash.
Sipas Agjencisë Meteorologjike të Japonisë, problemi ndodhi gjatë llogaritjes së vendndodhjes së epiqendrës.
Konkretisht, sistemi vlerësoi gabimisht se epiqendra ishte rreth 680 kilometra më larg nga Japonia sesa vendndodhja e saj aktuale.
Ky supozim i gabuar ndikoi në llogaritjen e magnitudës së tërmetit, duke rezultuar në lëshimin e paralajmërimit për tërmet me magnitudë 9.9 ballë.
Edhe pse alarmi u korrigjua brenda pak minutash dhe nuk u regjistrua panik i përhapur, aktivizimi i sistemit të emergjencës shkaktoi ndërprerje të përkohshme në transportin publik.
Pas incidentit, JMA kërkoi falje publike, duke pranuar ndërprerjen e shkaktuar nga paralajmërimi i gabuar.
“Ne kërkojmë ndjesë sinqerisht për shqetësimin e konsiderueshëm të shkaktuar ndaj publikut”, u tha gazetarëve zyrtari i agjencisë Shinya Tsukada. /Telegrafi/