Ajdin Limoni është shqiptari që u bë hero në Wohlen të Zvicrës, pasi, ka arritur t’i shpëtojë katër të rinj, duke i nxjerrur ata nga një makinë e markës Fiat, që po digjej në rrugë.
Për mediat zvicerane, Limoni ka treguar këtë eksperiencë, duke thënë se ndonëse fitoi djegie në trup, nuk mund të mos t’i ndihmonte të bllokuarit në makinë, që thirrinin për ndihmë!
Rrugës për në shtëpi, shqiptari tha se po shikonte diçka që po digjej dhe kur u afrua, pa se kishte njerëz aty që po e shihin makinën teksa po digjej por nuk po ndërmerrin asgjë.
Sipas raportimeve, 53-vjeçari vrapoi drejt makinës, hapi derën dhe pa tre burra të pavetëdijshëm dhe një vajzë të re, e cila kishte vetëdije ende.
“Ajo po bërtiste “Më ndihmoni, më ndihmoni, po vdes, më ndihmoni!'” tha ndër tjera Limoni, duke shtuar se zëri i saj ishte një zë që nuk do ta harronte kurrë.
Ndonëse flakët raportohen të kenë qenë tre metra të larta, kjo gjë nuk e ndaloi Limonin që pavarësisht rrezikut, të intervenonte për shpëtim.
53-vjeçari kujton momentin kur e kuptoi se çfarë kishte ndodhur.
“Nuk mendova, doja vetëm të ndihmoja dhe të shpëtoja personat që ishin brenda. Vetëm se jam i zhgënjyer nga sjellja e kalimtarëve që e panë veturën duke u djegur, por nuk ndërhynë. Nuk është një ndjenjë e mirë”, tha Limoni për 20 Minuten, transmeton Telegrafi.
Kurse, sa u përket plagëve të Limonit, ai tha se ndonëse shenjat e djegies do t’i mbesin, ndjenja e shpëtimit është shumë më e mirë për të.
“Gjatë shpëtimit, pësova djegie në duar dhe ballë, të cilat kërkonin trajtim spitalor. E di që do të mbesin shenja të plagëve por dhimbja është e durueshme, por, kur mendoj se kam arritur të shpëtoj njerëz, ndihem relativisht mirë” ka shtuar Limoni.
E sa i përket aksidentit, ngjarja ndodhi të mërkurën rreth orës 20:45 në Alte Bremgarterstrasse në Wohlen, Aargau. Fiat Punto doli nga rruga në një kthesë të majtë për arsye ende të panjohura dhe u përplas me një pemë. Pas pak, makina u përfshi nga flakët.
Makina përmbante katër shtetas italianë që banonin në Zvicër, një vajzë 17-vjeçare dhe tre burra të moshës 17, 18 dhe 21 vjeç. Disa nga ndihmësit e parë i shpëtuan të katër nga Fiati që po digjej. Sipas policisë kantonale të Aargaut, ata ua shpëtuan jetën. /Telegrafi/