Një nga këshillat që shpesh qarkullon në shoqëri për pacientët e prekur nga kanceri është që ta ndalojnë plotësisht konsumimin e sheqerit. Por, sipas onkologut Arben Bislimi, kjo çështje nuk duhet të thjeshtohet në një ndalesë absolute.
Për këtë temë, Bislimi ka folur në episodin e 91-të të podcastit “Shëndeti në rend të parë”, i mbështetur nga United Hospital dhe Qendra Laserike e Syrit Kubati, ku u diskutua për kancerin, parandalimin, diagnostikimin dhe trajtimet e sotme.
I pyetur pse pacientëve me sëmundje malinje shpesh u thuhet të mos konsumojnë ëmbëlsira apo sheqer, Bislimi tha se një gjë e tillë haset shpesh edhe te pacientët që trajtohen në onkologji.
“Një gjë të tillë e hasim edhe te pacientët tanë, të cilët ne i trajtojmë, që vijnë me informacione që i marrin diku dhe na thonë se ne kemi filluar veç me dietën tonë pa sheqer”, tha ai.
Megjithatë, onkologu theksoi se organizmi ka nevojë për të gjitha grupet ushqimore, përfshirë edhe sheqerin dhe yndyrën, por në mënyrë të balancuar.
“Në fakt, organizmi ka nevojë për të gjitha. Ka nevojë edhe për sheqer, ka nevojë edhe për yndyrën, për gjithçka. Po duhet të jetë i balancuar”, u shpreh Bislimi.
Sipas tij, këshillat për ushqim të shëndetshëm duhet të kuptohen në kuadër të një diete të balancuar, ndërsa ndalesat e plota zakonisht lidhen me patologji të tjera specifike, për të cilat mjekët japin rekomandime të veçanta.
“Do të thotë, edhe për atë po flasim, për dietat e shëndosha në këtë kuptim”, tha ai, duke shtuar se ka raste të tjera mjekësore kur jepen këshilla se çfarë nuk duhet të konsumohet.
Bislimi sqaroi se ideja që sheqeri duhet të ndalohet krejtësisht, me arsyetimin se është shkaktar apo nxitës i drejtpërdrejtë i kancerit, nuk qëndron në atë formë.
“Të thuhet se të mos konsumohet fare sheqeri, sepse kjo është një prej arsyeve që po vjen drejt krijimit, nuk qëndron”, tha onkologu.
Ai shpjegoi se, në aspektin biologjik, qelizat malinje mund të krijojnë një mikroambient të përshtatshëm ku aktiviteti i glukozës mund të ketë rol, por kjo nuk do të thotë se sëmundja mund të shpjegohet thjesht me konsumimin apo moskonsumimin e sheqerit.
Sipas Bislimit, procesi i krijimit të një sëmundjeje malinje është shumë më kompleks.
“Mendohet se qelizat malinje mund të krijojnë një terren të përshtatshëm, një mikroambient, për shembull me rritjen e aktivitetit të glukozës së sheqerit në atë mikroambient”, tha ai.
Të neglizhosh një ndryshim të pazakontë në trup sot është e pafalshme? Sqaron onkologu Arben Bislimi
Megjithatë, ai shtoi se dëmtimi i qelizës, krijimi i mutacionit dhe zhvillimi i një sëmundjeje malinje nuk mund të reduktohen në një faktor të vetëm.
“Është më komplekse krijimi i një, dëmtimi i një qelize, i një bërthame, krijimi i mutacionit, se sa aq e thjeshtë të thuhet se konsumimi apo moskonsumimi i sheqerit mund të favorizojë një sëmundje malinje”, u shpreh Bislimi.
Për më shumë shikoni të plotë podcastin “Shëndeti në rend të parë”:
– YouTube www.youtube.com