PayPal tani dëshiron të bëhet bankë në SHBA. Kompania ka paraqitur aplikimet e kërkuara në Departamentin e Institucioneve Financiare të Utahut dhe në Korporatën Federale të Sigurimit të Depozitave për të krijuar PayPal Bank, e cila do të jetë një kompani e certifikuar e kredive industriale me seli në Utah.
PayPal thotë se kjo do ta forconte biznesin e saj dhe do të përmirësonte efikasitetin e saj, duke i mundësuar asaj të “mbështesë më mirë rritjen e bizneseve të vogla dhe mundësitë ekonomike në të gjithë SHBA-në”, transmeton Telegrafi.
Përveç ofrimit të kredive për bizneset e vogla, PayPal Bank do t’u ofronte klientëve llogari kursimi me interes, dhe gjithashtu do të bëhej anëtare e rrjeteve të kartave në SHBA “për të plotësuar aktivitetet e përpunimit dhe shlyerjes përmes marrëdhënieve ekzistuese bankare”.
Që nga viti 2013, PayPal thotë se ka “ofruar qasje në mbi 30 miliardë dollarë në kredi dhe kapital qarkullues për më shumë se 420,000 llogari biznesi në të gjithë botën”, dhe kjo bankë e propozuar do t’i lejonte asaj të “ofronte zgjidhje kreditimi biznesi në mënyrë më efikase për bizneset e vogla në SHBA, duke zvogëluar varësinë nga palët e treta dhe duke forcuar biznesin e PayPal”.
Nëse autoritetet miratojnë themelimin e PayPal Bank, depozitat e klientëve do të ishin të pranueshme për mbulimin e sigurimit FDIC. /Telegrafi/