Komuna e Rahovecit, përmes Drejtorisë për Buxhet dhe Financa – Zyra e Tatimit në Pronë, ka njoftuar të gjithë tatimpaguesit që ende nuk e kanë kryer pagesën e tatimit në pronë për vitin 2025, që këtë obligim ta përmbushin brenda afatit ligjor.
Sipas njoftimit zyrtar, pagesa e tatimit në pronë duhet të realizohet më së largu deri më 31 dhjetor 2025, në mënyrë që të shmanget llogaritja e interesit dhe gjobave për vitin 2026.
Nga komuna bëhet e ditur se, në rast të moskryerjes së pagesës brenda këtij afati, do të aplikohen masa ndëshkuese financiare.
Konkretisht, parashihet një gjobë prej 10 për qind mbi shumën e tatimit të papaguar, si dhe interes mujor prej 0.65 për qind mbi borxhin ekzistues.
Autoritetet komunale u bëjnë thirrje qytetarëve që ta kryejnë pagesën me kohë, duke theksuar se pagesa e tatimit në pronë përfaqëson një investim në të ardhmen dhe kontribuon drejtpërdrejt në interesin publik dhe zhvillimin e komunës. /Telegrafi/
