Për herë të parë në historinë e saj, Kombëtarja e Kosovës do të luajë në Ligën B të Ligës së Kombeve për sezonin 2026/2027, që shërben gjithashtu si fazë kualifikuese për Kampionatin Evropian 2028, i cili do të zhvillohet në Mbretërinë e Bashkuar dhe Irlandë.
Kosova ka kaluar nga Liga D dhe tri edicione në Ligën C dhe tashmë do të përballet me përfaqësuese të nivelit më të lartë në Evropë.
Sipas shortit të fundit, Kosova u vendos në vazon e katërt, së bashku me Suedinë, Maqedoninë e Veriut dhe Irlandën e Veriut.
UEFA ka vendosur që Kosova nuk mund të përballet me Bosnjën e Hercegovinën për arsye sigurie dhe politike. Kosova në grup do të ketë nga një përfaqësuese nga secila prej tri vazove të para, duke shmangur përballjen me Bosnjën e Hercegovinën.
Përveç kësaj, ndeshjet eventuale me Rumaninë, Ukrainën dhe Gjeorgjinë mund të jenë gjithashtu problematike, por nuk janë të ndaluara.
Në Ligën B, përbërja e vazove është si më poshtë
- Vazo 1: Skocia, Hungaria, Polonia, Izraeli
- Vazo 2: Zvicra, Bosnjë-Hercegovina, Austria, Ukraina
- Vazo 3: Sllovenia, Gjeorgjia, Irlanda, Rumania
- Vazo 4: Suedia, Maqedonia e Veriut, Irlanda e Veriut, Kosova