KORREKT / SOT22 nëntor 2026
Botimi digjital / Kontakt
KORREKT PRESS

QARTË. ÇDO DITË.Lajmet që kanë rëndësi.

KORREKT PRESS / KËRKIM

Gjej lajmin që të intereson.

Shkruaj të paktën 2 shkronja për të kërkuar në titujt e lajmeve.

Rezultate gjatë shkrimit
Lajme

Sa kushtuan skemat sociale në tetor? Shpenzimet u rritën për afro 400 mijë euro krahasuar me shtatorin

Sa kushtuan skemat sociale në tetor? Shpenzimet u rritën për afro 400 mijë euro krahasuar me shtatorin

Shpenzimet për skemat e mirëqenies sociale në Kosovë kanë arritur në mbi 82.8 milionë euro gjatë muajit tetor 2026, rreth 387 mijë euro më shumë sesa në shtator.

Të dhënat e Agjencisë së Statistikave të Kosovës (ASK) tregojnë rritje të numrit të pensionistëve bazikë dhe të përfituesve të shtesave për fëmijë, ndërsa rënie te numri i familjeve që marrin ndihmë sociale.

Në muajin tetor 2026, për skemat e mirëqenies sociale janë ndarë gjithsej 82 milionë e 876 mijë e 4 euro, ndërsa në shtator kjo shumë ishte 82 milionë e 489 mijë e 62 euro. Krahasuar me muajin paraprak, shpenzimet janë rritur për 386 mijë e 942 euro.

Të dhënat e ASK-së për muajin Tetor, 2026

Përkundër rritjes së shumës së përgjithshme të ndarë, numri i përfituesve ka shënuar lëvizje të ndryshme nga një kategori në tjetrën, raporton Telegrafi.

Numri i përfituesve të pensionit bazik të moshës është rritur nga 172,721 në shtator në 174,399 në tetor, apo 1,678 përfitues më shumë.

Për këtë kategori, në tetor janë ndarë 27 milionë e 781 mijë e 920 euro, krahasuar me 27 milionë e 614 mijë e 160 euro në shtator.

Rritje është regjistruar edhe te shtesat për fëmijë, skema me numrin më të madh të përfituesve.

Në shtator ishin 374,652 përfitues, ndërsa në tetor ky numër arriti në 375,185 apo 533 më shumë. Për këtë skemë janë ndarë mbi 13.5 milionë euro.

Në anën tjetër, Skema e Ndihmës Sociale ka shënuar rënie. Nga 14,664 familje përfituese në shtator, numri ka zbritur në 14,444 në tetor, që përfaqëson 220 familje më pak.

Edhe shuma e mjeteve të ndara ka rënë nga 2 milionë e 172 mijë e 544 euro në 2 milionë e 135 mijë e 692 euro.

Rënie e theksuar te familjet me fëmijë me aftësi të kufizuara

Një nga ndryshimet më të mëdha ndërmjet dy muajve vërehet te skema e përkrahjes financiare për familjet që kanë fëmijë me aftësi të kufizuara.

Në shtator kjo kategori kishte 9,394 përfitues, ndërsa në tetor numri ra në 4,565, pra 4,829 përfitues më pak.

Megjithatë, kjo rënie në numrin e përfituesve nuk tregon vetvetiu arsyet e ndryshimit dhe as nuk nënkupton domosdoshmërisht se ka rënë numri i familjeve që kanë nevojë për këtë mbështetje, shkruan Telegrafi.

Ndryshime të vogla janë regjistruar edhe te kategoritë e dala nga lufta. Numri i veteranëve të luftës është rritur nga 39,699 në shtator në 39,777 në tetor. Për ta janë ndarë 7 milionë e 846 mijë e 468 euro.

Ndërkaq, numri i pensionistëve kontributpagues të moshës ka shënuar një rënie të lehtë, nga 47,738 në 47,654 përfitues.

Më shumë përfituese lehona

Rritje është vërejtur edhe te skemat e mbështetjes financiare për lehonat.

Numri i lehonave të punësuara përfituese është rritur nga 2,176 në shtator në 2,231 në tetor, ndërsa te lehonat e papunësuara nga 6,817 në 7,053.

Për lehonat e punësuara janë ndarë 1 milion e 118 mijë e 500 euro, ndërsa për ato të papunësuara 3 milionë e 546 mijë e 325 euro.

Të dhënat e ASK-së për muajin Shtator, 2026

Vazhdon trendi i ndryshimeve në skemat sociale

Ndryshimet e regjistruara në tetor vijnë pas raportimit për muajin shtator, kur vëmendje të veçantë kishte marrë rritja e numrit të pensionistëve dhe rënia e numrit të familjeve përfituese nga ndihma sociale, krahasuar me shtatorin e vitit 2025.

Siç ishte raportuar edhe më herët, gjatë shtatorit 2026 skema e ndihmës sociale kishte 14,664 familje përfituese, krahasuar me 16,474 në shtator të vitit 2025, apo 1,810 familje më pak.

Të dhënat e tetorit tregojnë se ky numër ka vazhduar të bjerë edhe në raport me muajin paraprak.

Në përgjithësi, pensionet bazike të moshës dhe shtesat për fëmijë vazhdojnë të përbëjnë dy prej kategorive kryesore të skemave të mirëqenies sociale, si për nga numri i përfituesve, ashtu edhe për nga shumat e mjeteve të ndara. /Telegrafi/

Lista jote

Lexo më vonë.

Artikujt e ruajtur në këtë pajisje.

Ende nuk ke ruajtur artikuj. Hap një lajm dhe shtyp “Ruaj”, për ta lexuar më vonë.