Presidentin Hashim Thaçi e dënoi me 17 muaj burgim, ndërsa të tjerët i stërpiku nga pak… të kenë penguar drejtësinë.
Tri proceset e Thaçit, dy në Specialen e Hagës, më 16 shtator e 17 nëntor 2026 dhe tjetri i dënuar në mungesë me 10 vjet burg nga Gjykata e Qarkut në Prishtinë, më 11 korrik 1997 – me etiketën “terrorist”.
—-
Nga Agim Muhaxheri
Shfaqja e madhe, e dyta me radhë për ish- presidentin Hashim Thaçi, përfundoi të martën (17 nëntor 2026) në Specialen e Hagës.
Gjykatësi i vetëm Christopher Gosnell shpalli aktgjykimin ndaj pesë të akuzuarve duke i dënuar me gjithësej 42 muaj burg për veprën penale – tentativë të pengimit të personit zyrtar në kryerjen e detyrave zyrtare, shkelje të fshehtësisë së procedurës dhe mosbindje ndaj gjykatës.
Hashim Thaçi dënohet me 17 muaj burgim, Bashkim Smakaj e Fadil Fazliu me nga 12 muaj, Hajredin Kuqi – një muaj burg me kusht. Isni Kilajn e shpalli të pafajshëm.
Gjykatësi Gosnell ia prishi prokurorit, nuk e përfilli kërkesën e tij që Hashim Thaçi të dënohet me 6 vjet burg – ‘duke mos ia llogaritut kohën e qëndrimit në paraburgim… Thuase ai ka qëndruar në hotel!
Gosnell e zbuti zemrën, doli të jetë më ‘xhek’ (jack) se prokurori. Francezët do të ironizonin:
“Vive la justice”! (Rroftë drejtësia!).
Edhe në procesin e dytë, ndaj Thaçit, nuk pati prova valide. Ia ‘prenë teshat’ sipas thashethënave, sipas asaj: Deshi ai (Thaçi) të pengoj drejtësinë…
“Kjo është politikë. Nuk është drejtësi”, u dëgjua zëri i Thaçit – pa mikrofon – pas shpalljes së aktgjykimit.
Qeshja e tij ironike fliste se në Speciale
nuk ka drejtësi.
Në rastin konkret “tentativa” nënkupton veprimin që s’ka pasoja juridike.
A do ta gëlltit aktgjykimin absurd Gjykata e Apelit pritet të shihet.
Para dy muajve, përkatësisht më 16 shtator, në po këtë gjykatë Hashim Thaçin e dënuan për krime të luftës (jo për krim kundër njerëzimit) – me 25 vjet burg.
Para luftës, ata të regjimit serb ua veshnin shqiptarëve të Kosovës këmishat numër 136 e 125. I fajësonin të kenë kryer veprat penale sipas Ligjit Penal të Jugosllavisë:
- Bashkimi për veprimtari armiqësore (neni 136) dhe
- Terrorizëm (neni 125).
Neni 136 nënkuptonte: Synimi për ta rrëzuar rendin kushtetues…
Vepra penale e terrorizmit i veshej çdo shqiptar që i kundërvihej sistemit…
Mjaftonte të jesh shqiptar – kjo ishte ‘prova’ vendimtare – se je ‘terrorist’.
Para 29 vjete në Gjykatën e Qarkut në Prishtinë mbahet procesi i 15-ve, tre i nxorën para gjyqit, ndërsa të tjerët gjendeshin në arrati (ndër ta Adem Jashari, Hashim Thaçi, Rexhep Selimi…).
Hashim Thaçin e dënojnë në mungesë me 10 vjet burg. Kundër tij dhe të tjerëve regjimi serb pati lëshuar “poternicën” (urdhërarrestin).

