Talenti brazilian i Real Madridit, Endrick, ka reaguar lidhur me situatën e tij në “Santiago Bernabéu” dhe spekulimet e shumta për një largim të mundshëm gjatë afatit kalimtar të janarit, ku emri i tij po lidhet ngushtë me gjigantin italian, AC Milan.
20-vjeçari, i cili këtë sezon ka pasur minutazhë të kufizuar nën urdhrat e trajnerit José Mourinho, ka theksuar se nuk ka asnjë dyshim për të ardhmen e tij dhe se vendimi për hapësirat në fushë i takon vetëm teknikut portugez.
“Të luaj më shumë te Real Madridi? Është Mourinho ai që vendos, jo unë. Jam te Real Madridi, klubi më i mirë në botë”, deklaroi sulmuesi brazilian, duke shtuar më tej besnikërinë e tij absolute ndaj “Los Blancos”: “Shpresoj ta kaloj gjithë jetën time te Real Madridi”.
Këto deklarata vijnë në një moment kur mediat evropiane raportojnë se AC Milan është i gatshëm të bëjë një ofertë prej rreth 60 milionë eurosh (plus bonuse) për ta transferuar Endrickun në “San Siro”, duke i lënë madrilenëve edhe mundësinë e riblerjes për 80 milionë euro. Madje, thuhet se kuqezinjtë po synojnë të shfrytëzojnë edhe ndikimin e legjendës Kaká për ta bindur bashkëkombësin e tij.
Megjithatë, pavarësisht konkurrencës së ashpër në repartin ofensiv me yje si Kylian Mbappé, Vinícius Júnior dhe Arda Güler, vetë Endrick duket i vendosur të luftojë për vendin e tij, ndërsa edhe Mourinho raportohet se nuk dëshiron të heqë dorë nga shërbimet e tij në mes të sezonit. /IndeksOnline/

