Gara për kreun e shtëpisë më të madhe të futbollit botëror, FIFA, ka marrë një kthesë të papritur. Drejtuesi i Federatës së Futbollit të Francës, Philippe Diallo, është zyrtarizuar të hënën si kandidat për president të FIFA-s, duke u shndërruar në rivalin kryesor të presidentit aktual, Gianni Infantino.
Vendimi u mor gjatë një mbledhjeje urgjente të Komitetit Ekzekutiv të UEFA-s, ku 21 anëtarët e institucionit evropian i dhanë mbështetjen e plotë 63-vjeçarit francez për zgjedhjet e 18 marsit, në një garë ku pritet të jetë edhe zyrtari veteran japonez, Kohzo Tashima, shkruan IndeksOnline.
“Philippe Diallo e ka pranuar ftesën për të kandiduar”, njoftoi UEFA, duke vlerësuar përvojën e tij të gjerë dhe duke shtuar se federatat kombëtare kanë kërkuar rikthimin e unitetit dhe besimit në futbollin botëror.
Kandidatura e tij pritet të formalizohet të martën në mbledhjen e Federatës Franceze, pak para skadimit të afatit zyrtar të FIFA-s të mërkurën në mesnatë.

