Kryqi zviceran pritet të përdoret në të ardhmen vetëm në mallrat që prodhohen ose përpunohen në Zvicër. Një komision i Këshillit Kombëtar ka hapur rrugën për hartimin e një projektligji që synon të vendosë rregulla dukshëm më të rrepta për përdorimin e këtij simboli në produkte.
Komisioni i Këshillit Kombëtar për Shkencën, Arsimin dhe Kulturën (WBK-N) ka njoftuar se i ka dhënë dritën jeshile komisionit homolog të Këshillit të Shteteve për hartimin e një projektligji lidhur me përdorimin e kryqit zviceran, transmeton Telegrafi.
Sipas propozimit, në të ardhmen, kryqi zviceran do të rezervohet ekskluzivisht për produktet që prodhohen ose përpunohen në Zvicër. Ndërkaq, përdorimi i tij vetëm në referenca për dizajnin apo kërkimin e kryer në Zvicër, pa qenë produkti i prodhuar ose i përpunuar në vend, nuk do të lejohet.
WBK-N kishte miratuar më herët një iniciativë të Këshillit të Shteteve, duke mbështetur edhe dy propozime të tjera dhe një mocion. Vendimi u mor me 22 vota pro dhe dy kundër, raporton SRF.
Pas përfundimit të periudhës së konsultimit, Këshilli i Shteteve pritet ta shqyrtojë propozimin në gjysmën e parë të vitit 2027.
Ndryshimi i praktikës pas rastit me markën On
Nisma vjen pas një ndryshimi në praktikën e Institutit Federal Zviceran të Pronësisë Intelektuale (IGE), pas një mosmarrëveshjeje ligjore me markën zvicerane të këpucëve On, transmeton Telegrafi.
Pas këtij rasti, institucioni lejoi përdorimin e kryqit zviceran edhe në produkte të prodhuara jashtë vendit, nëse disa shërbime specifike, siç është dizajni, kryheshin plotësisht në Zvicër.
Propozimi i ri synon që përdorimi i kryqit zviceran të kufizohet në produktet që prodhohen ose përpunohen realisht në vend./Telegrafi/