Real Madridi ka siguruar transferimin e Latif Issman, mesfushorit 20-vjeçar të UD Logrones, i cili do t’i bashkohet ekipit të dytë të klubit madrilen, Castilla, nga vera e vitit 2027. Marrëveshja është nënshkruar këtë të premte, megjithatë futbollisti do ta përfundojë sezonin aktual te skuadra nga La Rioja, përpara se të transferohet në Valdebebas.
Ky është transferimi i parë i siguruar nga klubi madrilen për sezonin 2027/28.
Sipas gazetës Marca, Real Madridi e kishte përcjellë mesfushorin që nga vera e kaluar, ndërsa negociatat janë intensifikuar gjatë javëve të fundit, deri në arritjen e marrëveshjes përfundimtare.
Issman do të mbetet pjesë e UD Logrones deri më 30 qershor 2027, kur edhe i skadon kontrata. Për këtë arsye, transferimi i tij te Real Madrid Castilla është planifikuar për sezonin e ardhshëm. Vlera e operacionit nuk është bërë e ditur dhe nuk ka konfirmim nëse bëhet fjalë për një transferim pa kosto.
Marrëdhëniet mes dy klubeve kanë lehtësuar negociatat. Gjatë afatit kalimtar të dimrit të kaluar, ato kishin arritur marrëveshje edhe për transferimin e Manex Rezolas, i cili iu bashkua Real Madrid C.
Ky precedent hapi rrugën e bashkëpunimit mes dy klubeve, që tashmë ka dhënë rezultat edhe me transferimin e Issmanit.
Mesfushori është formuar në grupmoshat e reja të SD Logrones, përpara se të kalonte në strukturën e të rinjve të UD Logrones. Pas paraqitjeve në ekipin e të rinjve të Divizionit të Nderit dhe skuadrën rezervë, ai bëri debutimin me ekipin e parë gjatë vitit 2025.
Progresi i tij i ka mundësuar të bëhet pjesë e rëndësishme e skuadrës që garon në Primera Federacion.
Në sezonin 2026/27, Issman ka zhvilluar 10 ndeshje në kampionat, tetë prej tyre si titullar, ndërsa ka regjistruar edhe një asistim./Telegrafi/