Një ish-këshilltar i ish-kryeministrit ukrainas Mykola Azarov është plagosur nga shpërthimi i një makine në jug të Moskës, njoftuan të premten mediat ruse.
Sipas tyre, incidenti ndodhi në një rrugë kryesore në distriktin Chertanovo të Moskës, shkruajnë mediat perëndimore, përcjell Telegrafi.
“Sipas informacioneve paraprake, Sergey Zavorotny është plagosur gjatë incidentit”, raportoi RIA, duke cituar zyrtarë të zbatimit të ligjit, dhe duke e përshkruar atë si gazetar dhe ish-këshilltar të Azarovit.
Komiteti Hetimor i Rusisë njoftoi se ka hapur një çështje penale lidhur me incidentin dhe se një ekip hetuesish është dërguar në vendngjarje.
Azarov shërbeu si kryeministër i Ukrainës nën presidencën e Viktor Janukoviçit – i cili konsiderohej gjerësisht si një udhëheqës pro-rus – midis viteve 2010 dhe 2014.
Ai jeton në Rusi që kur u largua nga Ukraina gjatë protestave të “Maidanit” në vitin 2014, të cilat çuan në rrëzimin e Janukoviçit.
“Nuk di ende asgjë, përveç asaj që dini edhe ju – se makina shpërtheu diku në zonën e Chertanovos. Ai është gjallë dhe me gjasë ndodhet në spital”, ka thënë Azarov për mediat ruse, duke shtuar se ai vetë është mirë.
Askush nuk e ka marrë ende përsipër përgjegjësinë për shpërthimin e makinës. /Telegrafi/