Ambasada e Gjermanisë në Kosovë ka shprehur mbështetje të plotë për qëndrimin e Bashkimit Evropian lidhur me ndryshimet e propozuara në Ligjin për Dhomat e Specializuara të Kosovës, të njohura si Gjykata Speciale.
Përmes një reagimi të shkurtër, ambasada gjermane ka deklaruar se pajtohet plotësisht me qëndrimin e shprehur më herët nga Zyra e BE-së në Kosovë.
“Ne pajtohemi plotësisht me këtë deklaratë të BE-së”, thuhet në reagimin e Ambasadës gjermane.
BE-ja kishte shprehur shqetësim lidhur me mundësinë e votimit të ndryshimeve në këtë ligj në Kuvendin e Kosovës, duke vlerësuar se ato ngrenë pikëpyetje serioze për përmbushjen e obligimeve ndërkombëtare të Kosovës, pavarësinë e gjyqësorit, mbrojtjen e viktimave dhe dëshmitarëve, si dhe kushtetutshmërinë e ndryshimeve.
Bashkimi Evropian kishte theksuar gjithashtu nevojën për konsultime paraprake me autoritetet përkatëse para miratimit të ndryshimeve.