Presidenti i Shteteve të Bashkuara, Donald Trump, do takohet sot me më shumë se një duzinë drejtuesish të kompanive të mëdha të naftës në Shtëpinë e Bardhë, si pjesë e përpjekjes së tij për t’i bindur këto kompani të investojnë në rindërtimin e infrastrukturës së industrisë së naftës së Venezuelës.
Zyrtarë të lartë të kabinetit amerikan, përfshirë Sekretarin amerikan të Shtetit, Marco Rubio, sekretarin e Energjisë, Chris Wright dhe sekretarin e Brendshëm, Doug Burgum, do të bashkohen me presidentin në këtë takim, sipas një zyrtari të Shtëpisë së Bardhë, raporton cnn.
“Sot takimi do të jetë pothuajse ekskluzivisht një diskutim mbi naftën venezuelase dhe marrëdhënien tonë afatgjatë me Venezuelën, sigurinë e saj dhe popullin e saj. Një faktor shumë i madh në këtë angazhim do të jetë ulja e çmimeve të naftës për popullin amerikan”, shkroi Trump në Truth Social.
Nga kompanitë që do të dërgojnë përfaqësues në takim përfshihen Chevron, ExxonMobil, ConocoPhillips, Halliburton, Valero, Marathon dhe Shell, ndër të tjera.
Qëllimi kryesor është diskutimi i mundësive të investimeve në rindërtimin e infrastrukturës së sektorit naftës në Venezuelë, i dëmtuar rëndë pas viteve të pakënaqësive, mungesës së investimeve dhe politikave të mëparshme.
Ndryshe, presidenti i venezuelas, Nicolas Maduro, u kap më 3 janar 2026 gjatë një operacioni të forcuar ushtarak të Shteteve të Bashkuara në Venezuelë.
Në kuadër të kësaj ndërhyrjeje, Maduro dhe gruaja e tij u arrestuan dhe u dërguan më pas në New York për t’u përballur me akuza për trafik droge dhe “narko‑terrorizëm”. /Telegrafi/