Komandanti i Forcës së Sigurisë së Kosovës, Gjenerallejtënant Bashkim Jashari, është dekoruar me dy medalje nga Garda Kombëtare e Ajovës në Shtetet e Bashkuara të Amerikës.
Sipas njoftimit të FSK-së, dekoratat iu ndanë nga Agjutanti i Përgjithshëm i Gardës Kombëtare të Ajovës, Gjeneralmajor Stephen E. Osborn.
Jashari u nderua me Medaljen e Arritjeve të Larta të Gardës Kombëtare të Ajovës, si dhe me Urdhrin e Shën Mauricit, që është simbol i këmbësorisë.
Sipas arsyetimit të dekorimit, Jashari është vlerësuar për shërbimin e jashtëzakonshëm dhe udhëheqjen vizionare në krye të FSK-së, në mbështetje të Programit të Partneritetit Shtetëror me Gardën Kombëtare të Ajovës.
Në deklaratë theksohet se angazhimi i tij, përkushtimi personal dhe orientimi strategjik kanë ndikuar në zgjerimin e bashkëpunimit dypalësh në fushën e trajnimeve, ndërveprueshmërisë operacionale dhe zhvillimit profesional të udhëheqësve ushtarakë.