Ambasada Gjermane në Kosovë ka rikujtuar shfaqjen e dokumentarit “Eni’s Rescue”, i cili rrëfen historinë e një familjeje hebreje të shpëtuar gjatë Holokaustit, me ndihmën e shqiptarit nga Kosova, Veli Meliqi.
Dokumentari është shfaqur në Reporting House, ndërsa pas projeksionit është zhvilluar një bashkëbisedim me producentin e filmit dhe ish-ambasadorin Bernd Borchardt, shkruan Telegrafi.
Filmi tregon historinë e familjes hebreje Frances, e cila në vitin 1943 u largua nga Shkupi drejt Tiranës, me ndihmën e Veli Meliqit, i cili i ndihmoi të shpëtonin nga përndjekja naziste.
Në dokumentar përfshihet edhe dëshmia e Eni Altaratz, e lindur Frances, e cila sot jeton në Jerusalem. Përmes rrëfimit të saj, filmi sjell historinë e familjes dhe guximin e njerëzve që ndihmuan hebrenjtë gjatë asaj periudhe.
Ambasada Gjermane thekson se dokumentari trajton edhe rolin e veçantë të Shqipërisë gjatë Holokaustit, kur mijëra hebrenj gjetën mbrojtje falë solidaritetit dhe guximit të shqiptarëve dhe ndihmësve shqiptarë nga Kosova.
“Dokumentari hedh dritë mbi guximin dhe humanizmin e atyre që ndihmuan hebrenjtë të shpëtonin nga përndjekja naziste”, thuhet në njoftimin e ambasadës.
Në njoftimin e saj, Ambasada Gjermane ka falënderuar të gjithë pjesëmarrësit në këtë aktivitet, duke e cilësuar mbrëmjen si një mundësi përkujtimi dhe shkëmbimi të rëndësishëm rreth historisë së Holokaustit./Telegrafi/