Prishtina është rikthyer në krye të tabelës së Albi Mall Superligës së Kosovës, pas fitores së madhe 1-2 në udhëtim ndaj Dritës, në ndeshjen e mbetur të javës së dytë të kampionatit.
Kjo përballje kishte mbetur e papërfunduar në kalendar për disa javë, për shkak të angazhimit të Dritës në garat ndërkombëtare.
Me zhvillimin e saj, tashmë është kompletuar edhe renditja, me të dhjetë skuadrat që kanë nga 12 ndeshje të zhvilluara.
FC Prishtina, lidere në SUperligën e Kosovës telegrafi.com
Fitorja në Gjilan i ka mundësuar Prishtinës të marrë kreun me 29 pikë, të grumbulluara nga nëntë fitore, dy barazime dhe vetëm një humbje. Kryeqytetasit kanë kaluar në pozitën e parë, duke lënë pas Malishevën, e cila tashmë renditet e dyta me 27 pikë.
Malisheva humbi pozitën udhëheqëse pas barazimit 1-1 me Feronikelin 74 në shtëpi, duke mbetur dy pikë prapa Prishtinës.
Në pozitën e tretë vazhdon të jetë Drita, e cila pavarësisht humbjes në përballjen direkte me Prishtinën, ka 23 pikë, gjashtë më pak se lideri i ri.
Drita e treta në renditje telegrafi.com
Ballkani dhe Gjilani mbajnë pozitat katër dhe pesë, me nga 19 pikë, ndërsa Dukagjini renditet i gjashti me 18 pikë. Feronikeli 74 është në vendin e shtatë me 12 pikë, kurse Drenica zë pozitën e tetë me 11 pikë.
Në pjesën e poshtme të tabelës ndodhen Llapi dhe Vushtrria. Llapi është i nënti me vetëm pesë pikë, ndërsa Vushtrria mbetet e fundit me tri pikë.
Kështu, pas 12 xhirove të zhvilluara nga të gjitha skuadrat, Prishtina merr kreun e kampionatit, ndërsa gara për pozitat e para vazhdon të jetë e ngushtë, me Malishevën dhe Dritën që mbeten në ndjekje. /Telegrafi/