Ford ka prezantuar një version të veçantë të Mustang Fastback të vitit 1966, të pajisur me motor modern V8, në panairin SEMA 2026. Projekti, i quajtur Ford Racing R125, është krijuar si homazh për fitoren e Henry Fordit në një garë automobilistike në vitin 1901, sukses që i parapriu themelimit të kompanisë Ford Motor Company 125 vjet më parë.
Ndryshe nga shumë projekte të prezantuara në panaire automobilistike, R125 nuk është menduar vetëm për ekspozim dhe fotografi. Ford synon të dëshmojë se një Mustang klasik mund të pajiset me komponentë modernë, të mirëmbajtshëm dhe lehtësisht të disponueshëm, pa pasur nevojë për investimet e mëdha që zakonisht kërkohen për një restaurim të plotë modern.
Projekti është konceptuar si një automjet që mund të përdoret dhe të shërbejë si shembull për entuziastët e automobilave, e jo si një model muzeal që qëndron i ekspozuar. Kjo filozofi ka ndikuar në përzgjedhjen e të gjithë komponentëve, nga blloku i motorit deri te transmisioni, transmeton Telegrafi.
Synimi i Fordit nuk ishte të ndërtonte një makinë me fuqi ekstreme apo një model unik vetëm për ekspozita, por një restomod më të përballueshëm, të cilin pronarët e zakonshëm mund ta përdorin edhe në përditshmëri. Për këtë arsye, kompania ka përdorur pjesë që mund të blihen përmes katalogut Ford Racing Parts.
Motori, sistemi i injektimit të karburantit dhe transmisioni janë të gjitha pjesë të disponueshme në katalogun e kompanisë. Kështu, edhe ndërtuesit e tjerë mund të krijojnë një automjet të ngjashëm pa pasur nevojë të kërkojnë komponentë të rrallë apo modele që nuk prodhohen më.
Kjo qasje dallon nga projektet shumë të kushtueshme që zakonisht tërheqin vëmendjen në panairin SEMA. Ford synon të ofrojë një alternativë më ekonomike ndaj restomod-eve luksoze, siç është Revology Boss 429, duke ruajtur pamjen klasike të Mustangut dhe duke modernizuar pjesët mekanike.
Në pjesën e jashtme, R125 ruan siluetën karakteristike të Mustang Fastback të vitit 1966, ndërsa ndryshimet kryesore janë përqendruar nën karroceri.
Nën kapak është vendosur një motor V8 me vëllim 347 inç kub (rreth 5.7 litra), i ndërtuar mbi bazën e bllokut klasik të motorëve të vegjël të Fordit, me arkitekturë të ngjashme me atë të Boss 302 dhe lartësi prej 8.2 inçësh. Motori është pajisur me koka cilindrash prej alumini dhe ofron 360 kuaj fuqi, si dhe 400 lb-ft çift rrotullues, apo rreth 542 Nm.
Furnizimi me karburant realizohet përmes sistemit elektronik të injektimit Edelbrock Pro-Flo. Kjo teknologji moderne zëvendëson karburatorin tradicional, duke mundësuar ndezje më të qëndrueshme, veçanërisht në temperatura të ulëta, si dhe përdorim më praktik në përditshmëri.
Fuqia përcillet përmes një transmisioni manual TREMEC TKX-600 me pesë shpejtësi. Sipas Fordit, ky transmision ofron ndërrim më të butë të marsheve dhe qëndrueshmëri më të mirë krahasuar me modelin më të vjetër TREMEC TKO, të cilin e zëvendëson.
Dimensionet kompakte të transmisionit kanë mundësuar instalimin e tij në dyshemenë origjinale të Mustangut, duke kërkuar vetëm modifikime minimale.
Një nga përparësitë e këtij konfigurimi është se zëvendësimi i transmisionit nuk kërkon prerje dhe saldim të dyshemesë së automjetit. Kjo ul kostot e punës dhe e bën projektin më të realizueshëm edhe për entuziastët që nuk kanë në dispozicion një punishte profesionale.
Përmes R125, Ford synon të tregojë se një automobil klasik mund të ruajë identitetin dhe pamjen origjinale, duke përfituar njëkohësisht nga teknologjia moderne dhe komponentët që mund të sigurohen pa vështirësi. /Telegrafi/