Aleanca ka kritikuar menaxhimin e sektorit të energjisë nga Qeveria Kurti, duke pretenduar se gjatë kësaj periudhe mbi 1 miliard euro nga paratë e qytetarëve janë shpenzuar për importin e energjisë elektrike.
Përmes një reagimi në faqen zyrtare në Facebook, AAK ka vlerësuar se këto shpenzime dëshmojnë, sipas saj, dështimin në menaxhimin e sektorit të energjisë dhe mungesën e investimeve në rritjen e kapaciteteve prodhuese vendore.
Sipas kësaj partie, varësia e Kosovës nga importi i energjisë elektrike është rritur, ndërsa kjo gjendje është reflektuar edhe në shtrenjtimin e energjisë, duke rënduar buxhetin e familjeve kosovare.
Aleanca ka kërkuar hetimin e çdo dyshimi për keqpërdorim të parasë publike në sektorin e energjisë, duke kërkuar gjithashtu zbardhjen e asaj që e quan “mafia energjetike”.
Partia ka bërë të ditur se për këto çështje ka kërkuar interpelancë në Kuvendin e Kosovës.
“Duhet të zbardhet kjo skemë e organizuar dhe të ndalet ky degradim!”, thuhet në reagimin e Aleancës./Telegrafi.