Ndërrimi i kompanisë së sigurimit shëndetësor në Zvicër rezultoi të ishte një vendim i leverdishëm për mijëra persona. Të dhënat më të fundit të Zyrës Federale të Shëndetit Publik (FOPH) tregojnë se ata që ndryshuan siguruesin në fund të vitit 2024 patën rritje dukshëm më të vogël të primeve gjatë vitit 2025, krahasuar me personat që qëndruan te kompania e tyre e mëparshme.
Sipas statistikave, 7.5 për qind e personave të siguruar në Zvicër, ose rreth 663 mijë persona, ndërruan kompaninë e sigurimit shëndetësor në fund të vitit 2024. Një vit më parë, kjo përqindje ishte 8.4 për qind.
Në këto shifra nuk përfshihen rreth 327 mijë klientët e kompanive Supra dhe Easy Sana, të cilat ndërprenë aktivitetin në fund të vitit 2024, duke bërë që të siguruarit e tyre të detyroheshin të kalonin te një ofrues tjetër, shkruan Watson.
Më të prirur për ndërrim janë personat nga mosha 26 deri në 50 vjeç
Të dhënat tregojnë se nuk ka dallime të mëdha mes burrave dhe grave sa i përket ndërrimit të sigurimit shëndetësor. Megjithatë, mosha luan një rol të rëndësishëm.
Personat nga mosha 26 deri në 50 vjeç janë më të prirurit për të ndryshuar kompaninë e sigurimit. Grupi i moshës 31 deri në 35 vjeç përbën 12 për qind të të gjithë personave që kanë ndërruar siguruesin.
Ndërsa pas moshës 50-vjeçare, gatishmëria për të ndryshuar kompaninë e sigurimit shëndetësor bie ndjeshëm.
Jura në krye për numrin e personave që ndërruan siguruesin
Dallime të konsiderueshme vërehen edhe mes kantoneve zvicerane.
Kantoni Jura kryeson sërish listën, ku pothuajse një në pesë persona të siguruar ka ndryshuar kompaninë e sigurimit shëndetësor. Në vendin e dytë renditet Glarus, me 15.5 për qind.
Sipas FOPH-së, kompania e sigurimeve shëndetësore Glarus humbi pothuajse gjysmën e klientëve të saj në këtë kanton.
Në anën tjetër, numri më i ulët i ndërrimeve është regjistruar në kantonet e Gjenevës, Zugut dhe Basel-Stadt.
Ata që ndërruan sigurimin paguan më pak rritje të primeve
Përfitimi financiar nga ndërrimi i kompanisë së sigurimit shëndetësor shihet qartë në shifrat e vitit 2025.
Të gjithë të siguruarit u përballën me rritje të primeve, por jo në të njëjtën masë, transmeton Telegrafi.
Të rriturit që qëndruan te kompania e tyre ekzistuese paguan mesatarisht 25.50 franga më shumë në muaj, që përfaqëson një rritje prej 6.2 për qind.
Ndërsa për personat që ndërruan siguruesin, rritja mesatare ishte vetëm 9.90 franga në muaj, ose 2.7 për qind.
Në varësi të grupmoshës, nga 28 deri në 67 për qind e personave që ndërruan kompaninë e sigurimit arritën të paguanin më pak pas ndryshimit.
Megjithatë, të dhënat tregojnë se personat që ndryshojnë siguruesin zakonisht kishin prime më të ulëta edhe më parë.
Personat me franshizë të lartë ndërrojnë më shpesh sigurimin
Ndërrimi i kompanisë së sigurimit shëndetësor është më i shpeshtë te personat që kanë shpenzime më të ulëta shëndetësore dhe zgjedhin franshizë më të lartë.
Konkretisht, 12.4 për qind e personave me franshizë prej 2,500 frangash kanë ndërruar siguruesin.
Në mesin e personave me franshizë prej 300 frangash, kjo përqindje ishte dukshëm më e ulët, vetëm 4.7 për qind.
Afati për ndërrimin e sigurimit shëndetësor për vitin 2027
Personat që dëshirojnë të ndryshojnë kompaninë e sigurimit shëndetësor për vitin 2027 duhet të kenë parasysh afatin e fundit për anulimin e sigurimit bazë.
Sipas të dhënave të publikuara, anulimi duhet t’i mbërrijë kompanisë aktuale të sigurimit deri në fund të muajit nëntor.
Statistikat e Zyrës Federale të Shëndetit Publik tregojnë se krahasimi i primeve dhe ndërrimi i siguruesit mund të sjellin përfitime financiare, pasi rritja e kostove nuk është e njëjtë për të gjithë të siguruarit./Telegrafi/