Barcelona e ka identifikuar mungesën e efikasitetit në presionin e lartë si problemin kryesor taktik në dy humbjet e para të sezonit: ndaj PSG-së së Luis Enriques në Ligën e Kampionëve dhe kundër Real Madridit në El Clasico, të zhvilluar në ‘Camp Nou’.
Këto dy disfata treguan se, pavarësisht fitoreve të thella ndaj kundërshtarëve të tjerë, skuadra e Hansi Flickut është larg të qenit e përsosur.
Stafi teknik, i udhëhequr nga Hansi Flick, arriti në përfundimin se struktura defanzive e Barcelonës u ekspozua përballë kundërshtarëve me lojtarë të nivelit të lartë individual.
Si pasojë, katalunasit pësuan gjashtë gola në 180 minuta lojë. Trajneri gjerman është i shqetësuar, pasi e di se është jashtëzakonisht e vështirë të fitohet Liga e Kampionëve pa funksionuar siç duhet presioni ndaj kundërshtarit.
Në aksionin që solli golin për rezultatin 1-0 në ‘Camp Nou’, Raphinha doli për të bërë presion ndaj Dean Huijsenit, i cili kishte topin, ndërsa Anthony Gordon bëri një lëvizje të gjatë drejt Ibrahima Konates.
Ky veprim la Aurelien Tchouamenin të lirë në mesfushë, për shkak të vonesës së Fermin Lopezit për të mbuluar hapësirën. Kjo i mundësoi francezit të lidhej me Fede Valverden në krahun e djathtë. Uruguaiani e riktheu më pas topin te Tchoumaeni, i cili vazhdonte të ishte i pambuluar dhe kishte hapësirë për të vazhduar aksionin.
Pozicionimi pasiv i Lamine Yamalit bëri që Marc Cucurella dhe Bernardo Silva të mos mbuloheshin siç duhej, duke i mundësuar mesfushorit portugez të merrte topin me hapësirë.
Në atë zonë mungonte presioni nga Rodri ose Pedri, ndaj Bernardo kishte kohë të mjaftueshme për të kontrolluar topin dhe për ta pasuar në krahun e majtë.
Ndërhyrja e mëvonshme e Cucurellas e detyroi Joao Cancelon të largohej nga mbulimi i Yan Diomandes. Kjo hapi një korridor në qendër të mbrojtjes, të cilin e shfrytëzoi Kylian Mbappé për të shënuar.
Ishte një gol spektakolar, por mbi të gjitha një aksion që nxori në pah problemin kryesor taktik të Barcelonës: vështirësitë për të organizuar presionin e lartë dhe për të ruajtur ekuilibrin mbrojtës kur përballet me kundërshtarë të nivelit të lartë./Telegrafi/