Presidentja e vendit, Justina Shiroka Pula, u ka bërë thirrje shqiptarëve të Preshevës, Medvegjës dhe Bujanocit që jetojnë në Kosovë, të marrin pjesë masivisht në zgjedhjet e parakohshme parlamentare të 25 tetorit.
Presidentja ka theksuar rëndësinë e pjesëmarrjes në votime, duke e cilësuar atë si kontribut të drejtpërdrejtë për mbrojtjen dhe avancimin e të drejtave të shqiptarëve, njofton Dukagjini.
Shiroka Pula ka vënë në pah rëndësinë e bashkimit për një përfaqësim më të fuqishëm politik të shqiptarëve në Parlamentin e Serbisë.
“Bashkimi është çelësi i përfaqësimit më të fuqishëm politik. Prandaj, bashkë në listë dhe bashkë në votim. Për më shumë deputetë shqiptarë në Parlamentin e Serbisë. Për një zë më të fuqishëm në mbrojtje të të drejtave, dinjitetit dhe interesave të shqiptarëve”, ka shkruar ajo.
Shiroka Pula ka theksuar se çdo votë ka rëndësi për përmirësimin e pozitës së shqiptarëve në Preshevë, Medvegjë dhe Bujanoc.
“Të bashkuar në përfaqësim, më të fuqishëm në mbrojtjen e të drejtave tuaja!”, ka thënë Shiroka Pula.