Mbrojtësi i Liverpoolit, Ronald Araujo, ka kërkuar nga bashkëlojtarët të imponojnë lojën ndaj Villarrealit në përballjen e Ligës së Kampionëve, që zhvillohet sonte në “Anfield”.
Në konferencën për media, uruguaiani foli për përshtatjen te Liverpooli, pritjen nga tifozët dhe rëndësinë e shfaqjes së identitetit të skuadrës që nga minuta e parë.
“E njoh mirë Villarrealin, jam përballur shumë herë me ta. Është një skuadër e madhe me lojtarë cilësorë. Pas Barcelonës, ata kanë posedimin më të madh të topit në La Liga, gjë që tregon se çfarë lojtari kanë. Por ne luajmë në ‘Anfield’ dhe kemi identitetin tonë. Duhet të japim gjithçka që nga minuta e parë dhe ta imponojmë lojën tonë”, ka thënë Araujo.
Ai foli edhe për përshtatjen në pozitën e mbrojtësit të djathtë, duke pranuar se ndihet më rehat në qendër të mbrojtjes, por se është i gatshëm të luajë aty ku kërkohet nga trajneri.
“Nuk e mohoj se ndihem më rehat si qendërmbrojtës, por kjo nuk është problem. Në futboll ekziston një gjuhë universale. Nëse duhet t’i bërtasësh dikujt, ai do të të kuptojë”, u shpreh Araujo.
Uruguaiani bëri të ditur gjithashtu se po mëson anglisht, me qëllim që të komunikojë më mirë me bashkëlojtarët, përfshirë talentet e rinj Rio Ngumoha dhe Jeremy Jacquet.
Në fund, Araujo foli edhe për mungesën e Dominik Szoboszlait, duke e cilësuar mesfushorin si një lojtar të jashtëzakonshëm.