Një burrë në fshatin Prelluzhë të Vushtrrisë është arrestuar nën dyshimin për armëmbajtje pa leje, pasi kishte raportuar se nga shtëpia e tij ishte vjedhur një pushkë gjuetie.
Sipas raportit 24-orësh të Policisë së Kosovës, rasti i vjedhjes ishte raportuar më 18 tetor, ndërsa një ditë më vonë njësia e hetimeve ka verifikuar personin.
“Njësia e hetimeve ka verifikuar personin në fjalë dhe i njëjti posedonte vetëm një dokument që kishte aplikuar për armë dhe nuk posedonte leje”, thuhet në raportin e Policisë.
Me vendim të prokurorit, pronari i armës është arrestuar dhe intervistuar në cilësinë e të dyshuarit, ndërsa ndaj tij është iniciuar rast për armëmbajtje pa leje.
Pas intervistimit, ai është liruar dhe rasti do të vazhdojë në procedurë të rregullt. /Lajmi.net/
Burimi: lajmi.net ↗