Shtetet e Bashkuara po ndërmarrin hapa për të penguar mundësinë e tërheqjes së vendit nga NATO pa miratimin e Kongresit.
Për këtë çështje ka mbështetje dypartiake nga demokratët dhe republikanët.
Sipas legjislacionit amerikan, presidenti nuk mund ta pezullojë, ta ndërpresë ose të tërheqë SHBA-në nga Traktati i Atlantikut të Veriut pa pëlqimin e Senatit ose pa një akt të Kongresit.
Dy kongresistë amerikanë kanë prezantuar një projektligj dypartiak që do të kërkonte miratimin e Kongresit përpara se presidenti i Shteteve të Bashkuara të mund të nisë procesin e tërheqjes së vendit nga NATO.
Projektligji, i quajtur “NATO Shield Act”, është prezantuar nga demokrati Jimmy Panetta dhe republikani Joe Wilson. Nisma synon të krijojë një kuadër ligjor që do t’i jepte Kongresit rol të drejtpërdrejtë në çdo përpjekje presidenciale për largimin e SHBA-së nga aleanca.
Sipas propozimit, presidenti do të duhej të konsultohej me Kongresin përpara çdo veprimi për tërheqje. Brenda 48 orëve nga një veprim i tillë, administrata do të duhej t’i dorëzonte Kongresit një raport zyrtar.
Projektligji parashikon gjithashtu që procesi i tërheqjes të ndërpritet automatikisht pas 30 ditësh, nëse Kongresi nuk miraton vazhdimin e tij. Po ashtu, fondet federale nuk do të mund të përdoreshin për zbatimin e një tërheqjeje nga NATO që nuk është autorizuar nga Kongresi.
Panetta tha se NATO është një prej aleancave më të rëndësishme të sigurisë në botë dhe se Kongresi duhet të ketë rol në vendimet që mund të ndikojnë në të ardhmen e saj.
Ndërkaq, Wilson, i cili bashkëdrejton nismën, tha se projektligji do të siguronte që çdo vendim që mund ta dobësojë aleancën të shqyrtohet nga Kongresi.
Sipas Traktatit të NATO-s, një shtet anëtar mund të tërhiqet nga aleanca një vit pas dorëzimit të njoftimit zyrtar. “NATO Shield Act” synon të vendosë kërkesa shtesë në SHBA, duke e lidhur nisjen e këtij procesi me mbikëqyrjen dhe miratimin e Kongresit.
Projektligji parashikon edhe procedura të përshpejtuara në Kongres për shqyrtimin e rezolutave lidhur me tërheqjen, si dhe mundësinë e shqyrtimit gjyqësor të zbatimit të ligjit.
Ndryshe, çështja është rikthyer në vëmendje pas deklaratave të presidentit Donald Trump lidhur me NATO-n. /Telegrafi/