Presidenti i Shqipërisë, Bajram Begaj, ka dekretuar shkarkimin e Vlora Hysenit nga detyra e drejtoreshës së Shërbimit Informativ të Shtetit (SHISH).
Vendimi është marrë me propozim të kryeministrit Edi Rama, ndërsa vjen pasi Gjykata e Posaçme ka caktuar ndaj Hysenit masën e sigurisë “arrest me burg” dhe pezullimin nga detyra.
Më herët, Rama kishte paralajmëruar përmes një reagimi në rrjetin social “X” se Hyseni do të shkarkohej menjëherë nga detyra.
Ai kishte bërë të ditur gjithashtu se pas kthimit të tij në Tiranë do të procedohej me përzgjedhjen e drejtuesit të ri të SHISH.
Në dekretin e presidentit thuhet se shkarkimi është bërë në mbështetje të nenit 93 të Kushtetutës dhe nenit 5, paragrafi 2, të ligjit për Shërbimin Informativ të Shtetit. /Telegrafi/
