Instituti për Studime të Luftës Hibride “Octopus” dhe Instituti Shqiptar për Studime Ndërkombëtare (AIIS) kanë nënshkruar të enjten në Tiranë një Memorandum Bashkëpunimi për zhvillimin e hulumtimeve dhe aktiviteteve të përbashkëta në fushat e gjeopolitikës dhe sigurisë.
Drejtori i “Octopus”, Arben Fetoshi, ka thënë se marrëveshja synon forcimin e bashkëpunimit ndërmjet dy instituteve përmes projekteve kërkimore dhe aktiviteteve me interes të përbashkët, me fokus të veçantë në çështjet e sigurisë.
Sipas tij, bashkëpunimi do të përqendrohet në dezinformimin gjeopolitik, operacionet e ndikimit dhe narrativat strategjike.
Fetoshi ka theksuar se synimi është edhe zhvillimi i një platforme për dialog rajonal dhe forcimi i qëndrueshmërisë ndaj kërcënimeve hibride.
Ai ka falënderuar Prof. Dr. Arian Starovën dhe Prof. Dr. Albert Rakipin për mbështetjen dhe pritjen, si dhe për diskutimet lidhur me sfidat gjithnjë e më komplekse të sigurisë.
Fetoshi është shprehur i bindur se bashkëpunimi me drejtoreshën e AIIS-it, Alba Çela, do të kontribuojë në ndërtimin e një kornize për përgjigje më efektive ndaj sfidave që lidhen me demokracinë dhe orientimin euro-atlantik. /Telegrafi/