FC Drita ka zyrtarizuar transferimin e Marsel Ismajlgecit, i cili i është bashkuar skuadrës gjilanase si përforcim për sezonin e ri.
Ismajlgeci është një futbollist polivalent, i cili mund të luajë në krahun e majtë, por gjithashtu edhe në qendër të mesfushës. Kjo mundësi për të kontribuar në disa pozicione pritet t’i japë më shumë alternativa trajnerit të Dritës gjatë sezonit.
28-vjeçari ka një karrierë të pasur në futbollin shqiptar dhe atë rajonal. Ai është zhvilluar te Tirana dhe më pas ka luajtur për skuadrën e kryeqytetit, ndërsa karrierën e ka vazhduar edhe jashtë Shqipërisë.
Në Bosnje dhe Hercegovinë, Ismajlgeci ka qenë pjesë e Zrinjskit të Mostarit, ndërsa në futbollin kosovar ka veshur fanellën e Ballkanit. Me përvojën e fituar në këto skuadra, ai tani rikthehet në Kosovë për të nisur një kapitull të ri me Dritën.
Klubi gjilanas ka shprehur besimin se cilësitë, përkushtimi dhe karakteri i Ismajlgecit do të jenë një vlerë e shtuar për skuadrën bardhekaltër.
“Mirë se erdhe, Marsel! Suksese me fanellën tonë!”, ka shkruar FC Drita në njoftimin për transferimin. /Telegrafi/